Drugas nga nasakmit gikan sa CPDRC

NAKUGANG ang kapulisan sa Liloan, Sugbo human nila masayri nga ang tinubdan sa drugas sa ilang nadakpang suspetsadong level 2 drug pusher mao ang Cebu Provincial Detention and Rehabilitation Center (CPDRC).

Tungod niini, ang Cebu Provincial Police Office niingon nga ilang susihon kon wa bay jailguard nga nalambigit sa pagpayuhot sa ginadiling drugas.

Wa makaipsot si Jocelyn Correa, 49, minyo, human makuhaig upat ka medium packs ug usa ka pakete sa shabu ingon man P200 nga buy bust money atol sa operation sa Liloan police niadtong Martes sa alas 8:35 sa gabii sa Sitio Purok Molave, Barangay Tayud, Lilo-an.

Si Sr. Insp. Ramil Morpos, hepe sa Liloan Police Station nga nahinabi sa Sun.Star Superbalita, nagkanayon nga lima ka adlaw nilang gi-monitor si Correa una pa nila gipahigayon ang buybust.

Lakip sa ilang nasikop si Armando Agacita, 24, ulitawo, bata-bata ni Correa.

Matod ni Morpos nga makabaligya og tulo ka bulto matag semana si Correa.

Nakugang sila sa gibutyag niini nga ang shabu gikumpra niya sulod sa CPDRC.

Human masayri ni CPDRC warden Romeo Manansala ang taho, ila dayong gipahigayon ang search operation sa usa ka selda apan wa silay nakitang drugas.

Sa ilang pagsusi, ilang gidudahan nga ang drugas nagagikan sa inmate nga giila niyang si Gino Pilapil.

Si Pilapil kauban sa selda ni Allan, igsuon ni Correa. Sila si Pilapil ug Allan nangabilanggo sa kaso sa drugas.

Sa ila hinuong imbestigasyon kang Allan, kini nitug-an nga niadto lang Abril ang katapusang pagduaw ni Correa kaniya samtang ang suspek niingon nga niadto lang siyang Mayo nagsugod sa pagpaninda og drugas.

Human sa pag-imbestigar, gibartolina ang duha ka mga inmate nga molanat og unom ka mga buwan.

Aron masegurong way drugas nga makalusot, nagtinguha si Manansala nga makakuha sila og K9 unit nga makatabang kanila sa search operation sulod sa CPDRC aron pagsuta kon duna pinalusot nga drugas.

Samtang nasagmuyo si Gobernador Hilario Davide III nga nahimong tinudban sa drugas ang provincial jail.

Gusto niyang pahugtan pa sa mga gwardiya ug kadagkuan sa prisuhan ang seguridad ug pag-inspeksiyon sa bagahe sa mga bisita.

Si Supt. Rodolfo Albotra, hepe sa Provincial Intelligence Branch (PIB) niingon nga makig-alayon sila sa Cebu Provincial Anti Drugs Council batok sa drugas.

Ila usab nga susihon kon wa bay kawani o jailguard sa bilanggoan nga nalambigit sa pagpayuhot sa drugas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph