Dunay katuyoan ang kapildihan

HUMAN gianunsiyo kagahapon nga ang midaug mao si Timothy Bradley, nakurat ang katawhang Pilipino tungod kay nagtuo nga ang midaug mao si 8-division champion Manny Pacquiao.

Daghan ang nakurat sa resulta tungod kay tingali napildi sa pustahanay?

Ug tinuod nga nagminghoy ang tanan tungod kay nailog lagi ang bakus ni Pacman.

Apan, kon duna may mas labaw nga gisakitan sa resulta mao ang iyang inahan nga si Mommy Dionesia. Nakuyapan intawon ang giilang PacMom tungod kay di siya makatuo nga mapildi ang iyang pinangga nga anak.

Ingon gyud niini ang duwa sa kinabuhi. Dunay modaug, duna say mapildi!

Apan, nakadayeg kita sa gipakitang spormanship ni Pacman human sa resulta. Iyang gidawat ang kapildihan nga luag sa dughan. Iya sang girespeto ang desiyon sa mga hurado. Apan, di makadawat niini si Top Rank boss Bob Arum. Alang niya, gitikasan ang iyang manok!

Ang nahitabo sa karera ni Pacman, suma sa mga relihiyosong pundok, maoy mahimong sukdanan sa tinuod nga pagkatawo sa Pambansa Kamao.

Dinhi nato masukod ang pagkamasaligon niya sa atong Diyos. Kay samtang nagpadayon ang iyang training, iya nang gisalig ang iyang kadaugan sa Diyos. Makita nato kini sa iyang mga Bible study nga gihimo uban ang Team Pacquiao.

Nasayud kita nga dunay katuyoan ang Diyos sa kapildihan ni Pacman!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph