MANAGLAHI ang paagi sa katawhan sa pagsaulog sa Semana Santa. Sa mga katoliko, dunay moadto sa simabahan aron motambong sa kalihukan sa Biyernes Santo hangtud na sa Dominggo sa pagkabanhaw. Apan, mas daghan gihapon ang moadto sa mga nindot nga lugar-bakasyunan.
Di nato mapugos ang uban nga mosalmot sa aktibidad sa Simbahan sanglit gawasnon man kitang mopili kon unsay atong gusto. Wa sab kita gipugngan sa simbahan sanglit di man kinaiya sa simbahan ang pagpugong sa iyang katawhan.
Ang simbahan igo lang gyud sa pagpanghinaut nga molipang ang pagtuo ilabina sa mga Katoliko. Mao man gani nga gipahinumdoman kita ni Catholic Bishops' Conference of the Philippines (CBCP) President ug Lingayen-Dagupan Archbishop Socrates Villegas sa hustong pagsaulog sa Semana Santa.
Subay sa mensahe sa arsobispo ngadto sa katilingbang Pilipino, karon ang paghinumdom sa paghigugma sa Ginoo sa mga tawo. Ug masuklian lamang kini pinaagi sa paggahin og oras, paghinulsol, ug pag-ampo.
Dugang pa, ang Semana Santa mao ang panahon sa pagsakripisyo ug paghigugma sa isig-ka-tawo, labaw na sa atong Ginoo.
Nindot kini nga panawagan kon motuman lamang ang tawo. Kasagaran man gud kanato, wa naghatag og bili sa nindot nga pagtulun-an sa simbahan. Kon atong hisgutan ang pamilya, kadaghanan kanato nawad-an og 'moral ascendancy' sa kabataan tungod kay kita mismo wa man nagpuyo nga Kristohanon.
Igo na lamang kita (pwera sa maayo) pagsulti nga karon ang diwa sa paghinigugmaay ug pagpinasayloay sama sa gihimo ni Hesu Kristo. Apan sa tinuod nga kinabuhi, daghan pa kanato ang wa nahigugma sa pamilya, ug wa nagpasaylo sa mga tawo nga nakasala kanato.
Bisan ang atong mga politiko, igo lang silang mosulti nga gimahal nila ang katawhan sama sa pagmahal ni Kristo sa mga tawo. Apan kon atong susihon ang tinuod, gigamit lamang nila ang pulong gugma aron magpabilin sila sa gahum. Ila lamang gigamit ang tawo aron matagbaw ang ilang kaugalingong interes.
Lakip na ang mapahimuslanong negusyante, kay kanunay silang moingon nga gimahal nila ang ilang mga empleyado. Apan ang tinuod, gigamit lamang nila ang kusog sa iyang mga tawo (kadaghanan kanila nagdawatan lamang og P100 nga sweldo matag adlaw) aron sila moasenso.
Ning pagpamalandong nato sa Semana Santa, mahisama unta kita kang Kristo nga andam magpasakit sa kaugalingon tungod sa dako niyang gugma sa tawo.
Di man nato mahimo ang pagpasakit niya sa krus, apan mahimo unta natong magsakrispyo sa mga butang nga makatabang, makapagaan sa gipas-an nga krus, ug makapalipay sa atong isig-ka-tawo.