Dura: Pag-relib ni Danao daghan nalipay

DAGHAN ang nalipay sa pagka-relieved ni Police Sr. Supt. Vicente D. Danao Jr. isip direktor sa Davao City Police Office (DCPO) epektibo niadtong Lunes.

Labing seguro, ang unang nalipay niini mao ang iyang kapikas nga, suma sa alegasyon, makaupat ka higayon nakatilaw sa sakit nga kasinatian uban sa opisyal sa wa pa miadto sa Estados Unidos.

Ikaduha, mao ang kabanay nga posibleng nasakitan sa nahitabo. Di man god lalim nga magsud-ong kita sa atong kabanay nga nasakitan sa bisan unsang hinungdan, di ba tinuod?

Ikatulo, mao ang mga pulis nga wa nakauyon sa iyang pagdumala isip direktor sa kapulisan. Duna man goy mga pulis nga akong nadungog nga nakasaway sa pagka-istrikto sa opisyal.

Ug katapusan, nalipay sab ang kababaehan nga nagpasilong sa Gabriela Women's Party. Di ba mao man kining grupoha ang nag-rally atubangan sa DCPO niadtong miaging semana? Suma sa maong grupo, angay silutan si Danao sa iyang pagpasakit sa asawa.

Sa pagkatinuod, nagsugod kining tanan human miguwa sa YouTube ang video ni Colonel Danao nga nakiglalis sa babaye. Dihang akong gihinabi sa telepono ang opisyal niadtong Agosto 15 ning tuiga (adlaw nga nag-viral ang video), siya nagbutyag nga iyang asawa ang babaye. Siya nagsulti sab nga di na kini angay padak-on sanglit personal kini nga butang.

Atong girespeto ang opisyal sa maong hitabo, kay sa akong nasayran, wa gyuy magtiayon nga wa nagkalalis bisan sa diyutay lang nga butang.

Alang nako, ang nahitabo sa opisyal -- kinsa nag-atubang karon og reklamong grave misconduct and physical injuries -- angay panaminan sa ubang kapulisan, sundalo, ug labaw na sa tanan nga sama nako nga yanong lungsoranon.

Atong isilsil sa huna-huna ug kasing-kasing nga kitang tanan maghigugmaay, kay wa kitay katungod nga mopasakit sa uban, ilabina sa atong kapikas.

Angay natong hinumdoman nga ang matag usa kanato (asawa, bana, o silingan) dunay katungod nga angay respetuhon. Busa, magrespetuhay kita. Kay kon di nato kini himuon, manubag kita sa balaod sa tawo ug sa atong Diyos.

Isip sakop sa media, akong girespeto si Colonel Danao, kinsa di ikalimod nga daghang nindot nga accomplishments isip pulis. Sa samang pagkaagi, dako ang akong respeto sa mga kababayen-an nga biktima sa pagpangabuso.

Ug alang ngadto sa mga magtiayon, sulbara ninyo ang problema pinaagi sa "win-win solution" aron di moresulta sa kinasohay, pagkabungkag sa pamilya, o kaha maapektuhan ang trabaho.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph