Durano: Mantsa sa pagduda

ANG criminal justice system sa Pilipinas naghatag og dakong bentaha sa akusado kay pinasikad sa due process of law, ang gipasanginlan isipon man nga inosente sa sala nga gipasangil hangtod nga siya mahukman nga sad-an sa court of competent jurisdiction.

Gawas sa maong presumption of innocence, ang procedural requirement sa pagsikop, ngadto na sa custodial investigation, detention hangtod na sa pagkuha og testimonya aron kini mamahimong mapresentar ug dawaton sa Korte isip ebedinsya, delikado ug intrikado kaayo mao nga sayon da alang sa mga marunong nga mga abogado ang mangitag buslot aron makalingkawas ang ilang giserbisyuhang amo.

Lahi sa kasong civil ug administratiba, ang asuntong kriminal tungod kay kinabuhi naman ug kagawasan ang nakapusta unya ang estado naman mismo’y imong kontra.

Aron masegurong kadepensehan ang katungod sa inosenteng tawo, ang burden of proof kon ang obligasyon sa pagpamatuod sa quantum of evidence nga proof beyond reasonable doubt anaa gibutang sa abaga sa prosekusyon.

Dili lalim kining maong tahas, hilabi na kay sa mga kasong kriminal kasagaran sa mga mobuhat og salaod ang maningkamot man gyud sa pagpanglimpyo sa ilang binuhatan pinaagi sa paghipos sa bisan unsang lama sa ebedinsya nga makapakombikto kaniya.

Hinungdan nga daghang mga kaso ang mangasiyakoy kay bugtong circumstancial evidences ra man ang gihuptang hinagiban unya aron kini makapakumbikto sa akusado.

Gikinahanglan nga ang kutay sa mga sirkumstansya walay bugto nga ikaladlad kay og duna’y gamayng putol, magamit namang mantsa sa pagduda nga mamahimo ng depensa aron sa pag abswelto kanila.

Mao kini ang nahitabo sa celebrated case ni O.J Simpson didto sa Estados Unidos diin ang publiko tungod sa pagka bayolente sa kinaiya sa maong akusado. Ang publiko kumbinsido gyud nga siya da ang adunay motibo ug katakos sa paghimo sa pag-unay pagpatay sa iyang asawa.

Apan ang huwes, mipakanaog sa desisyon sa pag-abswelto pinasubay sa prinsipyo nga tungod sa mantsa sa pagduda, mas maayo pa nga makalingkawas ang usa ka gatos ka mga sad-ang kriminal kaysa makumbikto ug masilutan ang usa ka tawo sa sala nga wa niya mahimo. Apan ako nagtuo nga kining maong kahimtang mamahimo lamang sa mga kasong nagasukad sa circumstancial evidences.

Pero karong bag-o, gi-reverse sa Court of Appeals ang kumbiksyon ni John Llyod Ortiz  sa kasong frustrated murder subay sa pagpusil sa komentaristang si Choy Torralba.

Kini kay maoy gihatagan og gibug-aton ang testimonya sa usa ka bystander witness kaysa sa positive identification sa biktima nga nakabawos pagpusil sa namusil kaniya ug nabuhi pa gyud aron sa pag-asoy sa korte sa panghitabo.

Ning maong matanga sa kalambuan, mao gihapoy gihimong sukaranan ang mantsa sa pagduda.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph