Duterte nagpahimangno hiktan ang binuhing iro

Published on: 

SI DAVAO City Mayor Rodrigo Duterte nagpahimangno kagahapon, Dominggo, sa publiko nga ang siyudad dunay polisiya nga nga nagmando nga sikupon ang mga latagaw nga iro ug ipailawom sa euthanasia kun mercy killing.

Hinungdan, suma niya, ang matag tag-iya sa iro kinahanglan nga responsible sa pag-atiman sa ilang mga iro.

Si Duterte nagpunting sa City Ordinance 1457, nga nagdili sa publiko nga tugotan nga maglatagaw ang ilang mga iro/baka sa siyudad.

Ang Section 7 sa ordinansa nagsulti nga "dogs/cattle shall be considered stray if they are not accompanied by its owner and found wandering in public places."

"Dogs impounded will be under the care of the Office of the City Veterinarian for three days only and are subject for euthanasia/mercy killing," suma sa ordinansa.

Si Duterte nagsulti nga ang latagaw nga iro kasagaran nagdala og rabies.

"Mao nang kanang mga iro ninyo, hikti na kay mao nay mo-spread sa rabies. Kahibawo ko, masakitan mo kung mabingwit na sa taga Animal Control (of City Veterinarian Office). Grabe ang attachment ana, eh, labi na sa mga anak," pahayag ni Duterte.

Si Dr. Annabelle Yuman sa Department of Health (DOH)-Davao sayo nagpahimangno sa publiko nga pabakunahan ang ilang mga iro.

Suma niya nga ang rabies maoy grabeng makamatay nga sakit apan siento porsyento kini nga mapugngan.

Si Yuman nagkanayon nga dunay 14 ka mga kaso nga namatay tungod sa rabies gikan 2010 hangtud 2012 sa Davao City.

Ang buwan sa Marso maoy National Rabies Awareness Month sa nasud. (ANC)

Trending

No stories found.

Just in

No stories found.

Branded Content

No stories found.

Videos

No stories found.
SunStar Publishing Inc.
www.sunstar.com.ph