NANGAMBAK agi sa bintana ang pipila ka mga pasahero sa dyip human laing usa ang misyagit og tulis niadtong Martes mga alas 10:00 sa gabii sa Barangay 35 ning siyudad sa Cagayan de Oro.
Sakay ang mga biktima nga sila si Cherry Mae Pedero, 21, dalaga; Mark Jin, ug Loloy Duendez, pulos taga Carmen, siyudad sa Cagayan de Oro, niadtong tungora dihang adunay mideklarar og tulis.
Tungod sa kahadlok, laing lima ang nangambak nga pasahero samtang ang tulo ka mga biktima miagi sa sa bintana ug miambak human sa papgpanulis.
Si Pedero ang nadala sa Northern Mindanao Medical Center tungod sa bun-og nga naangkon niini. Hinuon anaa na sa luwas nga kahimtang. Samtang ang duha nagpablotter na sa hitabo sa Police Station 2 (PS2) sa Cogon.
Dili masuta sa mga pasahero kung pila ang suspetsado tungod kay sa wala pa miambak gipangkuha na ilang mga personal nga gamit sama sa bag nga adunay sagad sulod nga cellphone ug pitaka.
Nagtuo ang mga pasahero nga kuntsaba a driver sad yip ang mga tulisan tungod kay daw wala kayo sila gitagaan og pagtagad. Ang PS2 niingon nga ilang imbestigahan ang hitabo. (SVB)