Editorial: Angay planuhon

USA sa mga gibasol sa awtoridad ang gagmay nga dalan mao nga daghan ang nasunog nga balay niadtong Biyernes sa gabii.

Wa dayon nakalusot ang mga bombero tungod kay hagip-ot ang dalan, duna pay mga tawo nga nag-ilog sa mga bombero aron unahon pagbomba ang ilang panimalay.

Tungod sa maong kalisdanan, mikabat sa 2,394 ka balay ang gilamoy sa kalayo, nga subay sa inisyal nga report, anaa sa P66-milyones ang danyos.

Subay sa pahayag ni Mayor Rody Duterte kagahapon sa iyang programa sa telebisyon, bisan mga informal settlers ang mga nasunogan, di sila pugngan sa gobyerno nga mobalik pagtukod sa ilang balay sa dapit.

Husto ang pahayag sa mayor sanglit wa may lugar nga katarukan ang atong mga igsuon nga nasunogan.

Apan, ning ilang pagbalik sa lugar, angay nga motabang ang lokal nga gobyerno sa pagplastar kanila. Kinahanglan nga dunay maayong plano sama

sa han-ay sa subdivision aron di magkalanrakas ang mga balay.

Amo kining gisugyot aron nga panahon sa emerhensiya, dali lang unya nga makasulod ang mga morespondeng awtoridad.

Ang hagip-ot nga dalan maoy sagad nga hinungdan sa aberya panahon sa sunog ug uban pang di matagna nga suliran.

Dinhi na mosud ang City Housing Office, Davao City Disaster Risk Reduction and Management Council ug uban pang ahensiya sa gobyerno aron magiyahan ang katawhan sa maayong buhaton.

Ning hitaboa, di lang unta magpakabuta-bungol ang mga hintungdan sanglit alang kini sa kaluwasan sa tanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph