Editoryal: Ang wangwang ni Joavan

SAMA didto sa Kaulohan, si Presidente Noynoy Aquino, sa iyang pagbisita sa Sugbo niadtong Miyerkules, wa gayud mogamit og “wangwang.”

Bisan tuod og hataas ang convoy, ang gisakyan ni Presidente Aquino motuman gayud sa lagda sa trapiko diin mohunong kon puwa ang siga sa traffic lights. Kini maoy tipik lang sa pipila niya ka saad ngadto sa katawhan atol sa iyang inugrasyon.

Gustong ipakita ni Aquino sa mga katawhan nga siya, isip presidente, mao ang sumbanan

o modelo sa katarong. Way molabaw sa balaod. Aron pagtimbaya sa presidente, ang mga tinugyanan sa balaod daling mipahigayon og subsub nga pagpahigayon og checkpoints ug pag-inspeksiyon sa mga sakyanan nga adunay “wangwang.”

Tuod man, ubay-ubay ang naimbarguhan og mga “wangwang.” Dili gusto ang presidente nga ang “wangwang” maoy gamiton sa pipila ka mga opisyal sa gobiyerno aron sila daling palutson ug hatagan og prayoridad sa kalsada samtang ang mga ordinaryong tawo maoy maipit sa trapiko. Kini gihulagway nga usa ka pag-abuso sa gahom, butang nga dili gusto sa presidente. Pipila ka mga opisyales ang pilit nga mituman sa maong mando.

Gamay rang butang apan dako og epekto. Disiplina maoy katuyoan.

*******

Sa niaging adlaw, ang kontrobersiyal nga sinagop ni Talisay City Mayor Soc Fernandez nga si Joavan migamit og “wangwang” atubangan sa Palace of Justice sa dihang iyang gikuha si Benedict Gabasa, ang iyang higala nga nakapiyansa. Sa laktod nga pagkasulti, gibaliwala ni Joavan ang kamandoan sa presidente ug sa way kukahadlok siya patuyang nga mipawangwang.

Di man tuod siya opisyal sa gobiyerno apan kini maoy matang sa pag-abuso. Ingon ani na ba gayud diay kalig-on si Joavan?

Kini maoy hagit sa mga tinugyanan – kuhaa ang “wangwang” ni Joavan sama sa inyong gibuhat sa uban.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph