Editoryal: Chinese New Year

KARONG adlawa saulugon sa mga Intsik ang Chinese New Year.

Di lang sa nasud China kini saulugon, apan apil na sa ubang dapit sa kalibutan.

Mao kini ang pinaka-importanteng tradisyunal nga pista sa mga Tsino sa Sidlakang Asya.

Gawas sa Tsina ug Sidlakan Asya, ginasaulog sab kini sa habagatan-sidlakang Asya ug sa ubang rehiyon nga dunay dakong populasyon sa mga Tsino sama dinhi sa Pilipinas.

Daghan nga mga tradisyon ang gisunod sa mga Tsino mao nga dinhi sa atong nasud, sila ang labing adunahan nga hut-ong sa katilingban.

Nahimong adunahan sila tungod kay kugihan sila, kuripot ug maayong modala sa ilang negusyo.

Nindot kaayong sud-ungon nga nagmaya ang atong mga kaigsuonang Intsik karong adlawa sa ilang pagsaulog sa Chinese New Year, apan ang ilang mga trabahante nag-antos sa di maayong suweldo.

Di man hinuon tanan nga Intsik, apan dunay pipila ka mga balay patigayon nga gipanag-iyahan sa mga Intsik dinhi sa siyudad nga angay susihon sa Department of Labor and Employment.

Sakit paminawon ang mulo sa ilang mga empleyado nga wa gani makaabot sa minimum ang ilang sweldo.

Halos nalang pangayuon ang ilang kahago tungod sa gamay kaayo nga sweldo.

Dihang gipangutana kon giunsa sa ilang agalon nga nakalusot sa balaod, sila nagkanayon nga duha ka payroll ang ilang pirmahan. Ang usa mao kadtong dunay napatik nga kantidad sa ilang sweldo, samtang ang usa blanko nga mamahimo nilang butangan sa kantidad subay sa gilatid sa balaod.

Angay kining atimanon sa gobyerno sanglit makaluluoy ang mga yanong mamumuno, samtang haruhay ang ilang mapahimuslanong mga amo!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph