Editoryal: CPDRC merkado sa shabu?

KINING gisulti sa usa ka dinakpan nga drug pusher nga anha sa Cebu Provincial Detention and Rehabilitation Center (CPDRC) siya magkomprahan og mga shabu aron iyang ipamaligya, maoy angay ser­yusohon pag-imbestigar sa atong mga kadagkuang official sa Philippine National Police (PNP).

Si Jocelyn Correa, 49, kinsa lima ka adlaw sab nga gimonitor sa kapulisan, nakuhaag mga pakite sa shabu atol sa buy bust operation niadtong Martes sa Sitio Purok Molave, Barangay Tayud, Lilo-an.

Ang hepe sa Lilo-an Police Station nga si Sr. Insp. Ramil Morpos, sa ilang imbestigasyon niingon nga nasurprisa sila sa gibutyag ni Correa nga ang mga shabu didto niya kompraha sa CPDRC.

Kon tinuod man gani ning gisulti ni Correa, nganong duna may nakalusot nga binultong shabu sa CPDRC nga higpit ug estrikto man unta sila panahon sa ting bisita sa mga kapartidos sa piniriso?

Wala kahay nga dagkong official diha sa CPDRC nga nalambigit niini?

Nganong duna na bay daghang cellphones unya duna pay mga pocket wifi nga nakuha atol sa gihimong kinalit nga search operation kagahapon nga gidili man unta kini? Duna ba kaha kini pagtugot sa mga CPDRC officials?

Kadakong sukwahi paminawon nga ang CPDRC nga nisikat sa tibuok kalibutan human naumol ang dancing inmates sa miaging administration nga gani nahimong tourist attractions, karon mabaniog na hinuon nga komprahanan sa mga shabu?

Ang CPDRC officials mipahigayon og imbestigasyon kalabot niini pero hangtod nga di matagbaw ang publiko sa resulta, di usab mapapas ang dakong pagduda ngadto kanila.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph