NINDOT paminawon nga giawhag ni Local Government Secretary Manuel Roxas II ang mga local executives sa nasud ipadayon ang pagpatuman sa reporma labot sa maayong panggobyerno.
Gipunting ni Roxas sa iyang panawagan ang mga probinsiya, siyudad ug munisipyo aron nga makakuha sila og daghang suporta gikan sa nasyunal nga gobyerno.
Suma niya nga ang nasyunal nga gobyerno magpadayon sa pagbubo sa dugang pundo ngadto sa local government units tungod sa pagtuman sa "Daang Matuwid" ni Pangulong Benigno Aquino.
Apan, suma niya, ang nasyunal nga gobyerno di magpanuko sa pagsilot sa mga local executives kinsa mapamatud-an nga sad-an sa paggamit sa ilang posisyon.
Dugang sa kalihim nga 72 ka probinsiya, 137 ka siyudad ug 1,323 ka munisipyo sa tibuok nasud nagpadayong misunod sa Daang Matuwid.
General ra kaayo ang iyang pahayag. Tingali wa gyud masayud si Roxas gikan sa iyang mga sakop kung unsa ang gihimo sa mga local executives.
Daghan pa gihapon ang kurapsyon sa lokal nga gobyerno, wa lay mireklamo tungod kay mahadlok ang tawo.
Di lang unta kutob ang kalihim sa pag-awhag, kundi mohimo siya og dugang lakang unsaon masud sa ilang lit-ag ang mga kurakot nga opisyales sa gobyerno.