Editoryal: Gipasigarbo ni PNoy

SAYO pang ipasigarbo ni Presidente Nonoy Aquino III ang gilagdaang kasabotan tali sa Moro Islamic Liberation Front (MILF) sa Malacañang niadtong Lunes.

Usa ka ‘Framework Agreement’ pa lang kini nga gilauman nga maghatag og dalan alang sa hingpit nga pagpatuman sa Bangsamoro sa tuig 2016.

Ug buot ipasabot nga daghan pang tukion nga detalye busa, gikan karon ngadto sa 2016, daghang posibleng mahitabo -- puwedeng positibo o negatibo.

Basin mauwawan lang si PNoy sa iyang pamahayag nga tumang pagdayeg sa gihimo samtang sub­rang nisaway ug nipaubos sa sistema sa nag-unang Autonomous Region in Muslim Mindanao (ARMM).

Tinuod nga dunay kahuyangan sa ARMM apan dili kini tungod sa sistema, kon dili, ang

mga opis­yal nga nag-abuso sa pagdumala sa espisyal nga pangagam­hanan.

Dili ba kaha kini mahitabo sa Bangsamoro?

Ang mga nangaging kasabotan nahimong pak­yas sa iyang tumong ug giabusohan sa mga lider human wala kini motu­bag sa sentro sa rebelyon sa mga lumad sa Mindanao --

pagbawi sa ‘ancestral do­main’ (gisakmit gikan kanila sa pagligid sa kasaysayan) ug pagdumala sa kaugalingong nasod.

Sensitibo kini nga isyu sa nasod diin mayoriya ang mga Kristiyano samtang, giklaro usab nga sa Framework Agreement nga walay labot ang pagtuki bahin sa ‘hingpit nga kaugalingnan’ sa Bangsamoro.

Mapanglantawan na ang linugdangan sa kasabotan, dili kaha mobalik lang ang sirkulo sa kasaypanan sa pagbugtaw sa idlas nga kalinaw sa Mindanao?

Unsay maayong sugyot? Maayong dasigon ang malahutayong dayalogo sa halapad nga sektor sa Mindanao ug ang pagpalig-on sa ekonomiya -- kay walay buot mobuwag sa nasod nga adunahan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph