Editoryal: Hugot usab nga pag-ampo

DUNAY positibong kalambuan base kagahapon sa hapon kalabot sa bagyong Ruby.

Sa uwahing taho nga nahipos, mihinay ang gikusgon niini sigon sa gipahibawo sa tulo ka weather bureau nga mao ang Joint Typhoon Warning Center (JTWC), Japan Meteorological Agency ug sa Philippine Atmospheric, Geophysical and Astronomical Service Administration (Pag-asa)

Gani ang JTWC mibutyag nga dili na super typhoon ang maong bagyo human mius-os ang gikusgon niini gikan sa 215 kilometer per hour ngadto sa 195 kph.

Gibanabana usab nga adunay kausaban sa rota o sa maagi-an ni Ruby. Gituohan nga adto kini motugpa o mo landfall sa isla sa Burongan, Eastern Samar ugmang adlawa.

Apan bisan pa sa pag-us-os niini ngadto sa 195 nga kp. nga layo ra kon itandi sa bagyong Yolanda, ang maong bagyo mahulagway gihapon nga makahatag og dakong kadaot.

Kini tungod kay mihinay usab ang dagan niini nga nagpasabot lang nga makasinati ug grabing ulan sulod sa pipila usab ka adlaw.

Dili pa igo, nagkadako usab ang coverage niini nga posibling makadugang sa mga dapit nga maapektuhan.

Hinuon ang mga local government unit (LGU) sa nagkalainlaing lungsod ug siyudad way hunong sa pagpangandam.

Padayon ang pagpabakwit niadtong mga molupyo nga anaa sa peligrusong lugar.

Kini sama sa mga nanimuyo haduol sa kadagatan ug ingon man niadtong mga panimalay nga anaa sa mga lugar nga daling maigo sa landslide.

Alerto usab karon ang mga hingtungdan nga ahensiya nga may kalabutan sa emerhensiyang pa­nginahanglan.

Labaw sa tanan dili nato hikalimtan ang pag­hangad sa Kahitas-an dungan sa mga pangalyupo ug hugot nga pag-ampo alang sa atong kasiguroan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph