Editoryal: Industriya sa Marina

MAKALIPAY ug dakong garbo sa mga Filipino nga 35 ngadto sa 40 porsiyento o 400 mil sa internasyonal nga marino gikan sa Pilipinas tungod sa demanda gumikan sa iyang taas nga kalidad sa edukasyon ug maayong pamatasan sa trabaho. Samtang, 60 mil kanila nagtrabaho sa domestic nga rota sa mga barko.

Mao kini gibutyag ni Department of Transportation and Communucation (DOTC) Secretary Joseph Emilio Abaya dihang namulong atubangan sa kapin sa usa ka libo nga nigraduwar sa kurso bahin sa marina gikan sa University of Cebu-Maritime Education Training Center (UC-METC) niadtong Abril 3.

Nindot nga kalamboan tungod sa maayong kita sa panarbaho apan, sa pikas bahin, subo nga pamalandungon nga sama sa ubang kurso labi na sa nur­sing, ang oryentasyon mao ang pag-export sa kusog sa mga batan-on ug mga lantip nga Pinoy human kuwang o walay oportunidad sa lokal nga panarbaho ug dili malayo sa pamilya.

Makapahinuklog, world-class tuod ang atong mga tunghaan nga nagtanyag og mga kurso sa marina sama sa UC-METC apan ang atong industriya sa marina ulahi kaayo. Mga karaan o biya nga barko gikan sa Japan ug ubang nasod gipang-ayo lang ug gihimo nga pasaheroan ug cargo ship o roro vessel.

Duna ba kahay brand new nga pasaheroang barko sa nasod karon? Mas naila pa seguro ang ’floating coffins.’ Unsay gihimo sa DOTC? Ingon na lang ba niini hangtod-sa-hangtod? Ang barko maoy nag-unang sakyanan sa ma­yoriya sa populasyon o masa isip nasod nga archipelago.

Ug mas dalaygon ang DOTC kon mohatag pag­laom sa mga graduwado sa marina nga makasulod og trabaho sa world-class nga industriya sa nasod.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph