Editoryal: Kontrobersyal

NASURPRISA ang kalibotan kagahapon sa kontrobersyal nga kapildihan sa atong Pambansag Kamao Manny Pacquiao sa pagdepensa sa iyang welterweight title sa World Boxing Organization (WBO) batok kang Timothy Bradley ubos sa split decision.

Mismo ang mga tawo nga nanan-aw sa away sa MGM Grand sa Las Vegas, USA makita sa telebisyon nga wala dayon manglakaw, kadaghanan Amerikano, human sa pag-anunsyo sa kadaugan sa Amerikano nga si Bradley. Lahi sa mga nangaging away ni Pacquiao.

Timailhan ba kini nga ang mga tawo nga direktang nakasaksi sa away wala matagbaw sa hukom sa mga hurado?

Kon moabli kita sa internet, mabasa nato ang mga nagkalainlaing komentaryo nga pabor ni Pacquiao. Dunay nanggawas usab nga mga data sa gipangbuhian nga kumo sa duha ug labaw kaayo ang Pambansang Kamao. Hinuon, dili nato maseguro kon opisyal ba ang mga data nga gi-post sa internet.

Apan dili malikayan ang mga pagduda bahin sa pagpatigbabaw sa negosyo sa boksing ug pagmani­ubra sa sindikato sa duwa. Gisulti na ni Bradley nga ‘makurat ang kalibotan’ sa ilang away nila ni Pacquiao.

Sa pagkapildi ni Pacquiao, tataw nga dunay rematch nga mahitabo labi na nga kontrobersyal ang desis­yon, busa maayo sa negosyo. Nabaniog usab nga ang boksing usa sa mga ‘hugawng duwa’ sa kalibotan.

Alang sa mata sa mga Filipino, si Pacquiao maoy nidaug tungod sa iyang maayong labok nga gipakita sa away busa mapasigarbuhon gihapon kita kaniya.

Ug sa makausa pa, gihiusa ni Pacquiao ang mga Filipino sa pagbati ug hunahuna atol sa iyang away.

Related Stories

No stories found.
SunStar Publishing Inc.
www.sunstar.com.ph