Editoryal: Libud-suroy

SAMTANG nag-angat ang Sinulog Grand Parade hinayhinay nga gipanghipos sa Dept. of Social Welfare Services (DSWS) ang mga tawo nga lago nga namuyo ug nangatulog lang sa mga aseras sa dakbayan sa Sugbo.

Inubanan sa mga babayeng mga pulis, pipila ka mga multicab sa City Hall nagsaoysaoy matag gabii sa kadalanan aron paghipos sa mao nga mga tawo.

Gidala sila aron mahatagan og temporaryong kapasilungan, mapakaon ug malimpyuhan.

Tumong niini aron di sila makit-an sa liboan ka mga bisita sa dakbayan panahon sa Sinulog Festival.

Karon nga wa nay Sinulog, mamalik ra sab ning mga tawhana sa paglibod-suroy sa kadalanan ug sa samang higayon, anha ra matulog sa mga aseras.

Di unta kini mahitabo kon ang mga buhatan sa kagamhanan, sama sa Dept. of Social Welfare and Development (DSWD) inabagan sa local government units ug pribadong sector, magtambayayong sa pag-umol og programa sa pagsulbad niini.

Mag-unsa man ang pagpalambo ug pagpanindot sa mga dapit sa dakbayan kon dunay mga tawo nga magpuyo lang diha sa kadalanan?

Kon ang dagkong mga kompaniya migasto og minilyon sa usa lang ka proyekto alang sa usa lang ka adlaw, hayan mogahin sila sa kalihukan kansang katuyoan alang sa kaayuhan sa katawhan diin nabuhi ang ilang negusyo.

Depende ra ni sa pagkombinser ug pagpasiugda sa kagamhanan. Kana kon sa tinuoray naa sa ilang kasingkasing ang pagtabang ug pagserbisyo. Basin pa, kon di man mahanaw ang mga libud-suroy, maminusan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph