Editoryal: Mga sakyanan sa barangay

KON dunay panghitabo, mautingkay gyud ang balaud sama sa aksidente sa pagkalimbuwad sa trak de karga sa lungsod sa Barili nga nikalas og 10 ka mga tawo ug daghang angol.

Sumala sa polisiya sa lokal nga kagamhanan, ang trak de karga di mahimong pasakyan og mga tawo. Apan, mao kini ang taudtaod nga praktis sa hapit tanang barangay labi na sa bukirang dapit.

Ang sakyanan nga naaksidente sa Barili sa miaging semana gikargahan og patay ug gisakyan usab sa nagbangotan nga pamilya lakip mga tawo nga buot mohatod sa lubnganan sa nitaliwan na sa laing kinabuhi.

Dihang nawad-an og prino ang trak de karga, nalimbuwad ug nikalas sa mga inosente nga kinabuhi nga niduyog lang unta sa kasub-anan sa ilang silingan nga namatyan.

Tungod sa maong hitabo, mitumaw ang sugyot nga hugot nga pagpatuman sa lagda nga de gyud pasakyan og mga pasahero o ubang tawo ang trak de karga sa kagamhanan.

Gawas sa iyang naandan nga serbisyo sa pagkarga og mga materyal, gitugotan lang kini nga masakyan og mga tawo kon emerhensya nga medikal, panahon sa katalagman ug uban pa.

Apan ang maong sugyot nakasugat og daghang pagsupak sa mga opisyal sa barangay ug mga lumolupyo labi na sa mga bukirang barangay.

Ug nasayod usab kita nga maglisod sa pagbalibad ang mga lider sa barangay tungod sa kaluoy, gawas sa pulitikanhong konsiderasyon sa iyang mga botante.

Nunot sa panghitabo, naugkat usab karon ang tukma nga pamaagi sa paggasto sa pundo alang sa fuel sa sakyanan nga posible wa mosubay sa lagda sa Commission on Audit (COA) sama sa 22 ka mga barangay sa dakbayan sa Sugbo.

Sa dapit nga way igong transportasyon, did-an ba nato ang mga tawo sa paghangyo sa paggamit sa sakyanan sa barangay? Di nato mabasol ang mga lider sa barangay motugot, sila ang nasayod sa kahimtang sa dapit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph