Editoryal: Mga Soca

MADASIG kita nga mamati sa mga sunosunod nga state of the city addresses (Soca) sa mga mayor sa Metro Cebu nga nagsaysay sa kalamboan sa ilang tagsatagsa ka dakbayan. Una ang dakbayan sa Sugbo niadtong Hulyo. Nisunod ang mga dakba­yan sa Lapu-Lapu sa miaging buwan.

Si Gobernador Hilario Davide III nakahimo na sa iyang unang state of the province address (Sopa). Gipasigarbo niya ang paspas nga rehabilitas­yon sa amihanan sa Sugbo nga naigo sa bagyong Yolanda sa miaging tuig, ang pagplambo sa modernong Mactan Cebu International Airport (MCIA) ug uban.

Si Mayor Michael Rama siydudad sa Sugbo nipasigarbo sa dagkong proyekto sama sa Cebu City Medical Center (CCMC) nga tukuron gikan sa pribadong donasyon ug Bus Rapid Transit (BRT) project.

Si Mayor Paz Radaza sa Lapu-Lapu nilusad sa bag-ong branding isip “resort city” sa pag-ila sa mga nag-unang magbubuhis sa dakbayan gikan sa sektor sa turismo. Samtang, si Mayor Jonas Cortes sa Man­daue buot nga mas malig-on pa ang dungog isip sentro sa manufacturing sa Sugbo.

Labing ulahing nihimo sa Soca mao si Mayor Val Chiong sa Naga nanghambog sa daghang natapos nga proyekto sama sa Justice Hall, police ug fire stations, bag-ong merkado ug ihawanan.

Bahin sa ekonomiya, ang nahisgotang mga ma­yor pulos nitaho sa katawhan sa pagtubo sa ekono­miya. Walay krisis kon mamati kita sa mga Soca.

Apan ang missing o kuwang sa mga Soca sa mga mayor sa Metro Cebu mao nga walay sinya­les sa kahiusahan o pagkabana sa iyang silingang local government units (LGUs), sama sa nag-iyahay lang. Dili ba ang problema ug kalamboan sa LGUs sa Metro Cebu nagdugtong? Ang mga batakang problema sa Metro masulbad ug molambo kon dunay kahiusahan.

Related Stories

No stories found.
SunStar Publishing Inc.
www.sunstar.com.ph