DILI ikatingala nga labing daghang kaso sa sunog sa tuig mao ang mga buwan sa Marso ug Abril, panahon sa ting-init. Gawas sa walay pagpakabana, ang kauga sa palibot daling maduslitan sa kayo ug mokuyanap sa sunog.
Makaingon kita nga misiaw ang sunog human giobserbar ning buwana ang Fire Prevention Month aron pagpakaylap sa edukasyon ug aktibong pagpangandam sa sunog.
Sa unang semana lang sa pag-obserbar, dili na mominos sa 20 na ka mga sunog ang ning-igo sa dakbayan ug lalawigan sa Sugbo. Makaalarma nga gidaghanon. Wala ba ikaw mabalaka?
Wala kitay igong gahom sa kayo gawas sa pagpangandam - tukmang edukasyon ug mga kalihokan aron malikay, nag-unang tumong sa kampanya nga gipangunahan sa Bureau of Fire Protection (BFP).
Ang liderato sa barangay kinahanglan nga mohimo sa mas aktibong papel sa kampanya sama sa makanunayong pag-edukar sa mga lumolupyo ug pagpahigayon sa pinugsanay nga bansaybansay alang sa han-ay nga katilingbanong pagtubag sa alarma sa sunog ug ubang emerhensya.
Nasayod kita nga walay kapuslanan ang paningkamot sa indibiduwal sa paglikay sa sunog kon ang uban walay pagpakabana, maangin lang gihapon ang kinatibuk-an. Importante ang hiniusang paningkamot labi na sa mga dapit nga naghuot ang kabalayan.
Ang kayo importanteng gamit ug kabahin sa atong kinabuhi apan, mahimong usab kining mangtas nga instrumento sa atong pagbangotan. Sa pagkatinuod, ang sunog misiaw tungod sa walay igong pagkabana nga katilingban, busa maningkamot kita nga mahimong kabahin sa pagsumpo sa katalagman.