Editoryal: ‘Naglagiti’ sa kainit

MIPAKLI na usab ang laing panid sa mabulukon nga kasaysayan sa Sun.Star Superbalita.

Unang adlaw karon sa iyang paglakang ngadto sa ika-18 ka tuig sa pag-alagad ug paglingaw sa publiko.

Hamtong na ang mantalaan sa iyang kasinatian human sa iyang pagsaulog kagahapon sa ika-17 nga anibersaryo.

Isip bag-ong misulod sa pagka hamtong, naglagiti ang iyang kainit sa pagpalambo sa kaugalingon diha sa pagserbisyo sa publiko.

Tungod sa kainit, nasentro sa miaging kontrobersya apan kanunay giilogan sa masa ang katam-is sa iyang pagka batan-on.

Matuod nga naglagiti sa kainit.

Ang Sun.Star Superbalita naila sa ligdong ug kasaligang kasayoran hinungdan nga gihangop ug gimahal sa katawhan.

Ning unang adlaw sa bag-ong tuig sa Sun.Star Superbalita, takos nga lab-ason usab ang mga kalamposan nga iyang naangkon.

Kita ang unang mantalaang Binisaya nga inadlaw. Tinuod, may nag-unang mantalaan Binisaya na niadto, sa wa pay gubat ug human sa Ikaduhang Gubat sa Kalibotan, apan senimana o binuwan ang paggawas niini.

Ang Sun.Star Superbalita inadlaw na (daily) sukad sa iyang pagkahimugso. Gani, dihay higayon nga kaduha sa usa ka adlaw kini nigawas (morning and evening edition).

Kita ang unang Binisaya nga mantalaan nga gipublikar ‘in full color’. Nitala usab isip labing dakong sirkulasyon sa kasaysayan sa lokal nga pamantalaan.

Ning laing panid sa Sun.Star Superbalita, magpadayon ang iyang kawsa ug adbokasiya sa pagpalambo sa pinulongang Binisaya.

Daghang salamat sa inyong suporta nga naghimo kanamo nga numero uno!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph