Editoryal: New7Wonders Cities

GARBO sa dakbayan sa Sugbo nga nominado sa New7Wonders Cities nga gipasiugdahan sa Swiss nga kompaniya, ang samang grupo nga nilusad sa New7Wonders of Nature diin nalakip ang underground river sa Palawan.

Gikan sa 300 ka nominasyon sa tibuok kalibotan, gihashasan kini ngadto sa 77 ug tulo ka mga dakbayan sa Pilipinas nga naglakip sa Sugbo, Iloilo ug Vigan sa Ilocos Sur.

Ang listahan sa 77 pagahashasan kini ngadto sa 28 ug ipaubos sa online voting sugod sa Oktober 21. Ang top seven cities ipahibalo unya sa hinapos sa tuig 2014.

u201cGlobal in its scope, this remarkable New7Wonders long list reflects the energy and culture of the city at its best,” matod ni Weber sa New7Wonders website.

Ang undeground river sa Palawan mahukmanong pinal nga nakasulod sa New7Wonders of Nature of the World human sa hiniusang kampanya sa mga lokal nga kagamhanan sa dakbayan sa Puerto Prin­sesa ug lalawigan sa Palawan.

Gawas sa garbo nga makulit sa kasaysayan, ang pagkasulod sa New7Wonders Cities gipalauman nga mas mopa­lambo sa turismo sama sa nasinati sa Palawan karon.

Maayong mag-una si Mayor Michael Rama sa kampanya sa pagseguro sa botasyon online alang sa dakbayan sa Sugbo ug suportahan sa mga lokal nga kagamhanan sa Metro Cebu, lakip ni Gob. Junjun Davide sa lalawigan.

Segurado nga makabenepisyo ang tanan sa kalamboan sa turismo sa pagkasulod sa Sugbo sa New7Wonders Cities. Labing importante ang suporta gikan kanatong tanan pinaagi sa pagbisita ug pagboto sa website sa New7Wonders Cities.

Related Stories

No stories found.
SunStar Publishing Inc.
www.sunstar.com.ph