PURSIGIDO ug seryuso si Provincial Board member Arleigh Sitoy kalabot niining iyang “Motorcycle Riding-in-Tandem” ordinance nga kon mapasar daghan ang mga kabus nga maapektohan niini.
Nindot unta ang katuyoan ning maong ordinansahon kay lagi gitumong kini aron pagsugpo niadtong mga killer o criminal nga yano nga makaipsot sa mga tinugyanan sa balaod ug dali rang makatago ginamit ang motorsiklo.
Pero mas mitumaw pa man hinuon ang daghang pangutana kay sa tubag kalabot niining maong ordinansa nga nagdili na sa pag-angkasay sa motorsiklo gawas lang kon anak, asawa o partidos hangtod sa fourth degree.
Unsaon pag-ila sa modakop sa mag-angkasay kon partidos ba kini sila o dili? Padad-on ba ni Sitoy og birth certificate, marriage contract o bisan unsa nga dokumento nga magpamatuod nga sila partidos?
Kakuti, kasalikwaot kaha ani no ug kadako usab sa kalangan sa mga mag-check point nga mosita unya sa mga mag-angkasay.
Unya og kon ang wa mailhing mga tulisan manag-agaw o igsuon, makalusot ra diay gihapon sila.
Duna say laraw si Sitoy nga mopasaka og amendment sa iyang ordinansa nga dili niya ipaapil ang mga habal-habal motorcycle kay lagi nakatabang kini sa transportasyon sa mga tawo nga nagpuyo sa hilit o sa kabukirang dapit.
Unya siguro si Sitoy nga dili mogamit og habalhabal motorcycle ang mga tulisan o killer?
Mora man og kining ordinansaha di maoy sulosyon. Nakahatag na man hinuon ni og dugang problema sa uban.
Bisan unsaon pa og regulate ang mga motorsiklo mogamit gihapon ang mga criminal tungod kay lagi dali ra silang makaipsot niini.