DILI lalim ang kasakit nga gihambin karon sa pamilya sa 20-anyos nga si Cyrish Magalang kinsa nabiktima sa usa ka linuog ug bangis nga kamatayon didto sa Bacoor, Cavite.
Ang bag-o lang nigradwar ug usa usab ka cum laude sa Sto. Tomas University nakaangkon og 49 ka dinunggaban nga maoy hinungdan sa iyang kamatayon.
Buot unta siyang lugoson sa managsuong Rolin ug Roel Gacita Jr., usa ka tricyle driver, sa niaging semana ug sa iyang pagsukol ug pagpanalipod sa iyang kaugalingon, gidunggab siya sa makadaghang higayon.
Ang mga suspetsado miangkon nga nakagamit sila og shabu ug nakainum usab og ilimnong makahubog pipila ka gutlo sa wa pa kini nila buhata.
Tungod sa maong hitabo, daghan ang nanawagan ilabi na ang Volunteers Against Crime and Corruption (VACC) nga unta ibalik sa atong mga magbabalaod ang silot kamatayon.
Nagtuo ang VACC nga ang pagbalik sa silot kamatayon maghatag og kahadlok ug makadiskurahi niadtong pipila ka mga linalang nga buot mohimo’g brutal ug linuog nga mga krimen.
Apan ang Malacañang ug ang Catholic Church officials dili uyon sa maong panawagan.
Ilang gibarugan ang prinsipyo nga bugtong lang nga ang Kahitas-an ra ang adunay katungod sa pagkutlo sa kinabuhi sa isig kaingon.
Pero sa samang higayon, wa nila tan-awa ang hulga sa mga kinabuhi nga tingali mabiktima pa sa laing susama ka linuog nga krimen o pagpatay.
Hangtod ang gobiyerno di maka-implementer og saktong solusyon nga makaalkontra ning maong klasing salaod, way rason nganong di ibalik ang silot kamatayon.