HUMAN madiskobrehi ang P10-billion pork barrel scam sa mga magbabalaod, misubaw na karon og maayo ang panawagan sa pagwagtang sa pork barrel o sa Priority Development Assistance Fund (PDAF) nga gigahin sa gobiyerno alang sa mga senador ug kongresista.
Pipila ka mga sektor lakip na ang Catholic Bishops’ Conference of the Philippines (CBCP) nga gipangulohan ni Fr. Joe Dizon ang nagtuo nga ang pork barrel fund maoy nahimong tuburan sa pangurakot sa mga magbabalaod.
Sayo ning semanaha, gikataho nga lima ka mga senador ug laing 23 ka mga miyembro sa House of Representatives ang nalambigit sa maong scam.
Imbis adto ihapak ang ilang pork barrel fund sa mga lehitimong proyekto sa mga kalungsoran, nadiskobrehan nga didto ra diay padulong ang pundo sa mga bogus nga non-government organization nga gani wa gyud mo-exist.
Gimaniobra lang sa mga tikasan nga mga senador ug kongresista.
Matod pa napulo na kini ka tuig nga gihimo sa mga way puangod nga magbabalaod kinsa way kahadlok nga mikurakot sa kuwarta sa mga katawhan.
Hinuon, di usab nato malalis nga daghan usab kaayong mga proyekto nga natukod ug nahimo pinaagi sa mga pork barrel fund nga napahimuslan og maayo sa katawhan.
Sa laktod nga pagkasulti, kining paggahin og Priority Development Assistance Funds (PDAF) o pork barrel aduna usay nahatag nga positibong butang.
Ang pagwagtang sa PDAF mahimong makaapekto usab sa mga proyekto alang sa katawhan.
Mas maayo pa siguro og usbon ang sistema o pamaagi sa pag-release sa PDAF aron malikayan ang pagpangurakot sa kuwarta sa gobiyerno. Istriktuhon.