USA ka empleyado sa Dole-Stanfilco ang gipusil patay sa alas 7:20 sa gabii niadtong Lunes didto sa probinsiya sa Cotabato.
Ang kapulisan nag-ila sa biktima nga si Armand Castillo, 40, minyo ug molupyo sa Barangay Marbel, siyudad sa Kidapawan.
Sigun sa taho gikan sa Cotabato Police Provincial Office, nga samtang nag-inom ang biktima sa usa ka tindahan sa Barangay Gubatan, Magpet, kalit lang mibutho ang duha ka wala mailhing armadong tawo ug gipusil siya gamit ang kalibre .45 nga pistola.
Dali sab nga misibat ang mga suspetsado sakay sa motorsiklo paingon sa wala matino nga direksyon sa diha nga ilang nakit-an ang biktima nga naligo na sa iyang dugo.
Gisapupo si Castillo sa mga barangay opisyal ug gidala sa Magpet District Hospital, apan gideklara siyang dead on arrival sa mga mananambal gumikan sa grabeng samad pinusilan nga nahiaguman sa ulo ug sa likod nga bahin sa lawas.
Matud ni Magpet Mayor Efren Pi¤ol nga walay nakaila sa mga mamumuno gumikan kay pulos sila nagkalo ug kalit sab kaayo ang hitabo.
Apan si Cotabato Police Provincial Director Cornelio Salinas nagkompirma nga mga miyembro sa New People's Army ang mitipi sa biktima tungod kay gi-akusahan siya sa mga rebelde nga asset sa militar. (Edgardo Fuerzas)