MGA DYOKER? Ang atong klase sa pamulitika karon imbis nga molambo tungod sa edukasyon ug teknolohiya nahimo na hinuon nga kataw-anan. Ang ubang kandidato bisa’g dili joker magpadyoker-dyoker aron makuha ang atensyon sa mga botante.
Niadtong panahon nga nagpurol pa ko (karon magpurol lang gihapon) ang mga kandidato mohisgot lang gyud og plataporma sa ilang pang gobyerno ug isyu alang sa kaayohan sa tanan katawhan.
Karon ang hisgotan sa mga kandidato ug sa ilang mga alalay mao ang sakit sa usa ka kandidato. Hinuon angayan ang lungsod makahibawo sa kahimtang sa panglawas sa usa ka kandidato kay usa kini nga basihan kon angayan ba nga pilion ang kandidato nga dunay gimulo sa iyang panglawas.
Niadtong Sabado, ang nagbansiwag nga estorya sa The Freeman nga si Mayor Mike Rama gidungog nga dunay prostrate cancer ug si Kong. Tomas Osmeña milarga og dali-dali sa Amerika aron pagpatsek-ap sa iyang kanser sa pantog.
Ang mga taga Sugbu dugay nang’ nakahibawo nga si Kongresista Tomas gioperahan ang iyang pantog tungod sa kanser. Ingnon tang pung nga ang nagdag hilas sa headline sa The Freeman mao ang balita nga si Mayor Rama dunay prostate kanser.
Gipanghimakak ni Mayor Rama nga dunay kanser ang iyang prostate. Ingon man si Kongresista Tomas mihimakak usab nga delikado iyang kabutang. Matud pa ni Tomas gideklarar na siya sa iyang doktor nga libre na siya sa kanser.
Atong hatagan og gamayng pagtuo si Mayor Rama nga wa siya masakit og prostate kanser ug si Kongresista Tomas naayo na. Kon kinsa nilang duha ang namakak sa ilang kaugalingong kahimtang atong mahibaw-an unya inig-abot sa ilang tagsa-tagsa ka oras.
Laing pay komedya, matud pa sa estorya sa mga kusog moinum og beer nga ila sad nahagdaw gikan sa ilang higalang’ doktor, ang hinungdan kuno sa prostate kanser duha a. Posible nga nakuwangan o di ba nasobrahan sa sex.
****
TIKAS. Akong awhagon ang mga opisyales dinhi sa National Food Authority (NFA) sa pag-usisa sa mga tindahan sa bugas, labina sa mga supermarkets. Naay daghan tikas ang pagbaligya sa bugas labina kadtong gibaligya nga sinako nga tag 25 ug 50 kilos.
Ang tikas nga akong gihisgotan usa ka pamaagi nga ang barato nga klase nga bugas, sama sa bugas sa NFA, isagol sa maayong klase nga bugas, kanang atong giingon nga dunay pangan o branded. Ang sampol sa kahon insakto apan sulod sa sako di na ta segurado.
Sa miaging semana mipalit mi og usa ka sako nga 25 kilos nga California rice gikan sa usa ka supermarket sa dakbayan sa Mandaue. Sa unang higayon nga gilung-ag ang maong California rice migawas dayon ang natoral nga baho sa bugas sa NFA.
Ang bugas sa NFA dunay baho sa kemikal. Basi sa akong nahibaw-an ang maong kemikal di makahilo apan ang baho makawa sa gana og kaon. Ang bugas sa NFA gibutangan og kemikal aron di makaduol ang mga insekto ug ilaga sa bugas nga naa sulod sa bodega sa NFA.
Di man kay karon pa ni nahitabo nga nakapalit mi og bugas nga dunay baho sa bugas sa NFA. Duna koy impormasyon nga nadawat kaniadto nga dunay usa ka negosyante sa bugas nga nag-repacking nga isagol ang bugas sa NFA sa maayong’ klase ug ibaligya sa presyo sa maayong’ klase nga bugas.
Ato ba ni sabton nga dunay pagtugot ang NFA sa mga negosyante sa bugas, labina kadtong nag-repacking og bugas, nga mahimong’ isagol ang bugas sa NFA sa bugas nga maayong’ klase unya ibaligya sa mahal nga presyo?
Akong panghinauton ang mga opisyales sa NFA dinhi sa Sugbo nga mohimo og inspeksyon sa mga bugas nga gibaligya di lang sa mga supermarket apan apil ang tanan nga namaligya aron og masakpan ikiha dayon ang mga tikasan.
(elespinoza@yahoo.com)