Espinoza: Gibogoan sa katawhan

GIBOGOAN. Ang mga abo­gado ni Chief Justice Renato Corona sa impeachment trial nagtuo nga sila ra ang maantigo. Tiaw mo, matud pa sa iyang mga abogado, kadtong tulo ka account sa PSB sa ngan ni Corona dili iyaha.

Ang account with No. 089-121019523, nga gi­ab­lian ni­­­adtong Dec. 22, 2009 gidepositohan og P8.5 milyunes. Ang ika­­duhang account nga giablihan niadtong Sept.

1, 2010 gipundohan og P7,090,099.45. Samtang ang ikatulo dunay pundo nga P17 milyunes.

Kining tulo ka account gisirhan niadtong Dec. 12, 2011 sa dihang gipasaka ang impeachment sa Kongreso.

Ang depensa ni Co­ro­na, matud pa sa iyang mga abogado, nga kwarta ni sa Basa-Guidote Enterprise (BGE) Inc. ang kumpaniya sa iyang asawa. Suma total, ang kwarta sa ngan ni Corona mokabat P32,590,099.45. Bisag unsaon og sumada sa sweldo ni Corona di gyud mo­abot ning kantidara.

Susmaryosep! Pagka­ma­a­­­yong tawo diay ning si Mrs. Corona kay mi­sugot nga ang kwarta sa ilang kumpaniya (P32,590,099.45) ibutang lang sa ngan sa iyang bana nga dili gani apil sa korporasyon.

Ang maong rason di man gani tuhoan sa mga bata kita pa kaha. Pagkahamabaw nga depensa.

Ilang lalison ang dokumento sa banko sa ngan ni Corona? Kon tinuod pa nga kwarta ni sa BGE, dili angayan nga isira ug igawas ang kwarta niadtong Dec. 12.

Gawas pa, ang usa sa mga kaso batok ni Corona ning im­peachment mao ang wa pagdeklarar sa iyang SALN ning dakong kwarta nga naa sa PSBank. Gani angayan na mo­­urong ang prose­cution sa pagprobar sa maong kaso.

Mao ni ang akong nakita nga depensa ni Corona. Tungod kay matud pa dili iyang kwarta ang naa sa PSBank dili siya obligado nga iyang ideklarar sa iyang SALN. Hehe, pasensya lang pero hinanggaw man na nga rason. Gibogoan sila natong tanan.

****

MAKAMAO. Luoyang Ma­yor Mike Rama. Bisag unsay programa nga iyang ipalusad sa dakbayan way pus alang kang Kong. Tomas Osmeña. Alang kang Tomas siya ra ang makamao unsay maayo alang sa dakbayan.

Atol sa miting sa Association of Barangay Council, si Mayor Rama mipasupot sa programa sa iyang administrasyon nga mao ang kalikasan, climate change, basura, coastal management, polusyon ug solid waste management.

Samtang si Tomas ang iyang pirming gipasulabi mao ang pagpasulod og imbestor dinhis dakbayan sama sa call centers diin ang makabenepisyo ang mga taga dakbayan lang gihapon. Bantug ra ang problema sa basura gisalikway lang.

Bisan pa sa panghinaot ni Mayor Rama nga sila si Kongresita Tomas ug Cutie del Mar mopaluyo sa programa sa dak­bayan, gibirahan ni Tomas si Mayor Rama nga misuporta sa Ciudad project ni Gob. Gwen Garcia nga mamutol og kahoy.

Apan ang Fifth Avenue Pro­perty Development Corp., ang kontraktor sa Ciudad, mipasalig nga way kahoy nga putlon. Kon duna man, igo lang ibton og ibalhin og tanum.

Matud pa sa tinubdan, ang gipanulti nila ni Rama, Osmeña, ug Del Mar niadtong ABC miting mora na og pangumpan­ya alang sa sunod nga piliay. Sayoha no?

****

KIHA. Mora og girak­rakan ang mga opisyales sa Comelec dinhis Cebu sa hulga ni Atty. Gloria Dalawampu nga iya silang ikiha kabahin sa recall petition sa Danao city, nga matud pa iregolar ang paglili sa mga pirma.

Giakusahan usab ni Atty. Dalawampu, ang abo­gado ni Danao city Mayor Boy Durano, nga dunay laraw-pangdaot ang mga opisyales sa Co­melec tungod kay ilang gi-ayudahan si City Co­me­lec officer Dominic Ian Marigomen.

Apan matud pa ni Cebu Provincial Election Supervisor Lionel Castellano igo lang sila mitrabaho basin sa order gikan sa ilang labaw sa Comelec. Kiha gyud aron mapugngan ang recall elections.

(elespinoza53@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph