Espinoza: Pit Senyor!

HAPSAY. Sa Dominggo pu­hon ato na usab pagaselebrahon ang pista ni Senyor Sto. Niño, ang deboto sa dakbayan sa Sugbo. Manghinaot ta nga manilawon ug hapsay ang para­da sa Sinulog sa Enero 15.

Karon semanaha daghan na ang nangabot gikan sa gawas ingon man gikan sa laing mga dapit dinhi sa Pilipinas aron mamista ug makasaksi sa Sinulog festival, ang tinuig nga kalingawan sa dakbayan sa Sugbo.

Ang Sinulog sa Kabataan sa dakbayan niadtong Dominggo malumposon, malinawon ug hapsay.

Matod pa ni Cebu City Police Office Director Melvin Ramon Buenafe kapin sa 100 ka pulis ang gi-deploy sulod sa Cebu City sports complex ug 200 sa gawas.

Si Buenafe misaad nga sa Dominggo, adlaw sa Sinulog, 300 ka pulis ang iyang i-deploy sa agianan sa Sinulog ug sa sulod sa sports center diin didto pagahimuon ang judging sa mga contestants.

Hinuon, sa mga nangagi nga Sinulog way dagkong kata­lagman nga nahitabo tungod kay ang tumong ug tuyo sa katawhan mao ang pagselebrar sa pista senyor ug paglipay ug hudyaka atol sa Sinulog.

Ang di kalikayan ug di kapugngan mao ang batasan sa kadaghanan nga bisag asa lang molabay sa ilang hugaw. Ang kadalanan unya nga agian sa Sinulog sa mapuno sa tanang klase sa basura bisan pa sa gipamutang nga basurahan sa daplin sa dalan.

Hinaot ning tuiga, nga kitang tanan, labina sa mga bisita, nga di magpataka og labay sa basura. Ang dakbayan sa Sugbo kinahanglan usab nga magbutang og daghan nga basurahan aron limpyo ang kadalanan ug sikopon ang maghugawhugaw. Pit Senyor!

****

PULITIKA. Ang publiko dugay nang nakasabot nga bisag unsay buhaton ni Cebu city Mayor Mike Rama paatbangan gyud ni kaniadto mayor karon Cong. Tomas Osmeña.

Sa kapin sa tuig na ang milabay, di gihapon malamoy ni Tomas ang kamaturoan nga gitalikdan siya ni Mayor Rama, ang iyang bata-bata kaniadto.

Gani daghan ang nahibung nganong hilum kaayo si Tomas sulod sa kongreso apan saba kaayo siya dinhi sa Sugbo nga unta ang iyang trabaho lehislatibo ug di na ehekutibo.

Duna koy nakailang gobernador sa Mindanao (di lang nako hinganlan) nga nagko­medya nga si Tomas nabaho ang baba tungod kay wa siyay tingog-tingog didto sa kongreso.

Ako sad gitubag ang gobernador nga gituyo na ni Kongresista Tomas nga di motingog sud sa kongreso aron duna siyay igong hangin nga ikabuga sa pagpanaway ni Mayor Rama dinhi sa Sugbo.

Di malalis nga mas daghan pa og gihimong balaodnon ang pambansang kamao nga si Cong. Manny Pacquiao kay ni Tomas nga maayo unta motabi ug molalis labina sa pinulongang English.

Unsaon man nga ang gipalabi ni Tomas mao ang pagbantay nga di makapundar ug makagamot si Mayor Rama sa iyang pamulitika kay modagan man siya og balik pagka mayor.

Klaro kaayo nga nagpakita na og kahadlok si Tomas nga mapilde unya siya ni Mayor Rama sa piliay pagka mayor sa tuig 2013. Mao nga di gyud undangan ni Tomas og saway ug away si Mayor Rama.

Sa nangagi, si Tomas mihatag og ayuda sa mga namuyo sa sapa ug suba nga ipademolis ni Mayor Rama ang mga kabalayan aron mahalikay sa disgrasya sa panahon sa bagyo.

Gihatagan usab ni Tomas og tabang ang mga casual sa city hall nga wa ma-renew ang ilang kontrata ni Mayor Rama.

Bisag ingnon tang pung nga personal nga kwarta ni Tomas ang gipanghatag aning mga tawhana apan tataw kaayo ang iyang pamulitika ug tuyo nga mauwawan si Mayor Rama ug mawad-an pa gyud og posibleng botante sa 2013.

Ingon ani ang pulitika sa Pilipinas, baho pas patayng ilaga.

(elespinoza53@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph