GIAWHAG ang mga opisyal sa barangay pagbantay ug pagpaniid sa kalasangan aron malikayan ang “forest fire”.
Ang kabomberuhan gi-awhag sab sa pagbutang og fire truck sa bukid.
Ang lakang namugna tungod sa padayong kainit sa panahon ug pagka uga sa mga dahon tungod sa kainit.
Si Bokal Juan Bolo mopalabang og resolusyon sa hunta probinsyal nga nanawagan sa mga barangay opisyal aron tahasan ang mga tanod sa pagbantay ug pagpaniid sa kalasangan.
Karong panahona, matod ni Bolo halos nangalaya ang mga dahon sa kalasangan mugna sa sobrang init sa panahon.
Gisugyot usab ni Bolo nga kon adunay sobra nga fire truck ang usa ka lungsod o kasikbit nga siyudad, angayan nga magbutang daan og fire truck sa bukid ilabi na sa lugar nga delikado sa forest fire.
Samtang wa maalarma ang provincial agriculturist sa padayon pag-init karon sa panahon, ilabi na sa mga kadaot nga naangkon sa ubang kaumahan sa Sugbo
Ang tanan nga municipal agriculturist gitahasan sa paghimo og survey ug paghimo ug obserbasyon sa ilang isig ka lugar.
Si Dr.Necias Vicoy, ang Provincial Agriculturist nagkanayon nga normal lamang karong panahona nga buwan sa Marso moigo ang ting-init.
Apan kon molanat og taas-taas nga panahon ang ting-init ug molahos panahon sa ting-uwan, mao na kini ang delikado.
Gipasabot sa opisyal nga ang pagkubol sa mga tanum nga mais, normal lamang ug mismo ang mga mag-uuma nasayod na niini ilabi na panahon sa buwan sa Marso.
Ang pamahayag ni Vicoy namugna human masuta gikan sa lungsod sa Medillin nga adunay ektarya sa tanom nga mais ang nangadaot tungod sa init.