BAG-O lang mibisita sa atong siyudad si Bureau of Internal Revenue (BIR) Commissioner Kim Henares atol sa iyang gilusad nga "Register, File, Pay" Campaign sa SM ning atong dakbayan sa Davao.
Matud pas komedya ni Mayor Rody Duterte, bayad mo'g buhis kay kon dili, basig ilisan nako ang tunga sa "RFP" ug "I" nga mahimong "RIP". Okay, hinuon nahibawo kita nga joke lang na sa mayor.
Sa giluwatang pamahayag ni Commissioner Henares sa mga sakop sa media, gikompirma niya nga miubos gyud ang rice smuggling sa atong nasud, pinaagi sa tabang ni Mayor Duterte, dihang iyang gitudlo si Davidson Bangayan, alyas David Tan, dili lang sa dakbayan sa Davao kon dili sa tibuok nasud.
Subling gidayeg sa Commissioner ang katakus sa atong mayor sa pagdisiplina sa mga katawhan sa atong siyudad, ug kon mapili siya sa pagka-presidente, iya kining mabuhat sa tibuok Pilipinas.
May nakadayeg usab sa gihimo ni Commissioner Henares sa iyang walay puas nga kampanya sa pagbayad og buhis, ma-indibiduwal man, o mga dagkong negusyante.
May panultihon nga ang dugo daw maoy nagdala'g kinbuhi sa tawo, sa samang higayon, ang atong pagbayad sa insaktong buhis, kini sa ang dugo ug kinabuhi sa atong nasud.
Kon walay buhis, walay gobyerno, ug kon walay gobyerno walay proyekto, so walay edukasyon, walay mga empleyado -- wala tanan kay wa may ikasuweldo bisan pa sa atong mga otoridad, apan labaw sa tanan kon walay buhis wala say kurakuton ang mga opisyal sa atong gobyerno, diba mga sano?
Bilib ako kang Kim Henares, apan murag nanobra ug over acting ra kaayo. Ang tanang butang ra ba kon manobra na, makada-ut gyud. Una, ang iyang pag-akusa sa Philipine Medical Association of the Philippines nga kuno wala magbayad sa insaktong buhis kay waka mag-isyu og resibo sa ilang mga pasyente kon magpa-check-up ug uban pang doctor's fees.
Mahimong tinuod ang akusasyon ni Henare kay ako usab nagtuo niana, apan dili tanan? Kon kinsa kadtong doctor nga nakalapas sa pagbayad sa insaktong buhis, siya ang gukdon sa BIR ug silotan. Alang nako, dili ilampornas ang tibuok organisasiyon.
Kon makakita ka'g lima ngadto sa bayente ka police nga nag-abuso, imo na bang hukman nga ang tibuok organisasiyon sa Philippine National Police (PNP) nga pulos na mga abusador? Pagtuo ba ni Henares hinlo ang mga kawani sa BIR?
Pahinumdon lang kang Henares, ang nakasala maoy silutan, ayaw i-apil ang inosente, kay ang sala ni Juan, dili sala ni Pedro. O basig nagpasikat lang siya para i-convert sa politika pag-abot sa hustong panahon, mao nga mahilig siya sa publisidad? Pero bisan pa, bilib gihapon ko dili lang unta manobra, diba?
Alang sa dugang komento, pag-email sa algenoguin@yahoo.com or superbalitadavao@yahoo.com.