Genoguin: Ikatulong Sona ni P-Noy

STATE of the Nation Address (Sona) karong adlawa ipahigayon ni Presidente Benigno Simeon "Noynoy" Aquino III, ika-15 nga Presidente sa atong Republika sa Pilipinas.

Unsa man ang tumong niining Sona? Ang pinakasimpol nga tubag, "report to the nation." Iladlad sa Presidente kon unsay nahimo niya sulod sa usa tuig nga pangatungdanan, kana kon aduna man, ug ang iyang mga plano sa sunod pang tuig.

Atong nabati ang unang Sona ni P-Noy niadtong tuig 2010. Bag-o pa siyang milingkod pagka-Presidente ug siyempre wala pa'y ikasukmat ang mga katawhang Pilipino niadtong tungora kay puro pa man saad ug mga plano.

Dili pa seguro nato hikalimtan ang iyang panaad nga wala nang "wang wang, iwanan na natin ang baluktot na daan, at dito na tayo sa matuwid na daan," di ba nahinumdom pa mo? Ang wang wang, kon atong sabton sama sa gibuhian nga pulong ni kanhi Presidente Erap Estrada sa iyang unang Sona, "Walang palakasan, walang kamag-anak sa akin walang kumpare lahat tayo ay pantay-pantay."

Karon sa ikatulong Sona ni P-Noy, unsa pod kaha ang iyang ipanghambog? Tingali, ang malampuson nga pagpalagpot kang Chief Justice Renato Corona ug ang pagpakulong kang kanhi Presidente Gloria Macapagal Arroyo.

Kon pag-angat sa atong ekonomiya ang atong hisgutan, seguro aduna pero ang mga negusiyante lang ang nakabenepisyo niini. Ang mga pobre kabus ug timawa, nagmantinil sa Conditional Cash Transfer (CCT) nga iyang kinopya kang GMA, ang Pangtawid Pamilyang Pilipino Program (4Ps).

Ambot lang og ipanghambog ba ni P-Noy ang atong paghulam og P1 bilyon dollars sa International Monetary Fund (IMF) aron itabang sa mga nasud sa Uropa nga nagkalisud-lisod sad sama nato. Maoy pagaingnon nga mangutang ta, aron ipautang. Nindot nga negusyo ni kon maoy magdahan. Nagpakaaron-ingnon nga busog, pero nagsusapinday sa tumang kagutom.

Magladlad na pod ang mga militanteng pundok karong adlawa aron yaga-yagaan ang Sona ni P-Noy. Aw, hinuon wala pa may Presidente sa atong nasud nga gidayeg ug nagustohan niining mga grupoha. Gawas lang tingali kon si Jose Maria Sison na maoy mahimong presidente.

Ang pagsaway sa mga binuhatan sa atong mga lideres maayo man, pero pangutan-a daw ninyo ang inyong kaugalingon kon unsa pod ang inyong gikatampo sa atong gobyerno para may kredibilidad tang mosaway.

Paminawa ang "KONTRA BALANSE" sa DXKT-1071 Khz, alas 7-9 sa buntag, Lunes hangtud Sabado. Ug paminawa sab ang RPN Visayas-Mindanao koneksiyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph