Genoguin: Kanya-kanyang panahon

KON politika ang atong hisgutan, daghan kaayo ang mangutana nako ug moingon, Al, makapabilanggo gyud kaha ni P-Noy si Senador Juan Ponce Enrile, Jinggoy Estrada ug Ramon Revilla, Jr.?

Igo lang ta motubag nganong ako may inyong pangutan-on nga dili man ko ang Ombudsman? Mas maayong si Ombudsman Conchita Carpio-Morales ang atong pangutan-on kong pasado ba ang kasong plunder nga gipasaka sa tulo ka senador, kay kining ato tagna-tagna lang ni.

Ang atong nabalitaan nga sunod semana na ipasaka ang maong kaso, ug sayod kita nga ang plunder walay piyansa nga gitugot. Sa higayon nga i-indurso na sa Ombudsman ngadto sa Sandigang Bayan mogawas gilayon ang orden de aresto, mosugot kita’g sa dili bisa'g unsa pa sila ka hamiling tawo sa atong nasud, bilanggoan gyud ang ilang tugpahan.

Pwedeng under house arrest, o pwedeng special treatment didto mismo sa bilinggoan. Nahibalo ba mo og unsa gyuy dakong sala niining tulo ka senador? Ug nganong sila lang ang gipasakahan og kasong plunder nga daghan man unta ang mga senador ug mga kongresista nga nalambigit niii?

Kana, tungod kay oposisyon sila ug nagdeklara kining duha nga modagan sa pinakataas nga posisyon sa 2016 eleksiyon. Sa politika, kanya kanyang panahon. Sa panahon ni Presidente Gloria Macapagal-Arroyo, si Joseph “Erap” Estrada ang iyang gipabilanggo. Sa panahon karon ni P-Noy, si GMA naman ang iyang gipabilanggo. Pero sagdi lang, ayaw mo kabalaka kay kon oposisyon na sab ang modaug karong 2016 presidential election, si P-Noy na sab ang ilang ipabilanggo.

Sa Africa kon gusto kang mag-presidente pagpabilanggo una ka. Kana ang nahitabo kang Nelson Mandela. Sa wa pa siya nahimong presidente, nabilanggo siya sulod sa 27 ka tuig. Sa Pilipinas, kon gusto kang magpabilanggo, pag-presidente una.

Ang kaluwasan ni P-Noy aron dili siya mabilanggo, kinahanglan gyud nga kaalyado niya ang mahimong presidente pagkatapos sa iyang termino. Karon ubos sa iyang panahon, legal pa ang pagasto kuno sa Malampaya funds, ug ang pagasto sa Disbursement Accelaration Program (DAP). Pero pag-abot sa sunod nga administrasiyon, illegal na na. Magbuot mo nga dili naman inyong panahon? Mao ni ang pinakadunot nga sistema sa atong politika. Only in the Philippines lang na!

Alang sa inyong dugang komento, pag-email sa algenoguin@yahoo.com. or superbalitadavao@yahoo.com.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph