Genoguin: Landslide sa Napnapan, walay politikong sad-an?

NAHIMONG kataw-anan ang mga politiko sa probinsya sa Compostela Valley. Midalikyat ko'g tan-aw sa balita sa lokal TV, nagtinulakay si Governor Arthur "Chiongkee" Uy, ug si Pantukan Mayor Celso "Tok" Sarenas kon kinsay angay basulon sa nahitabong landslide niadtong milabay nga Enero 5 niining tuiga.

Human sa nahitabong landslide niadtong bulan sa Abril 2011 sa Barangay Panganason nga gikamatay sa 14 ka mga tawo, nag-apruba diay ang Sangguniang Panlalawigan sa ordinansa nga "NO HABITATION POLICY", buot ipasabot gidili na ang pagpapuyo pagbalik sa maong lugar kay peligro na alang sa mga tawo.

Pero, ayaw kog ingna ninyo Gobernador ug Mayor nga inosente mong dako nga walay kalibutan kon may mga tawo bang mibalik pagpuyo didto o wala.

ESTORYAHE!!! Sa ilang gipamulong sa balita sa telebisyon nga akong nakita, ingon pa sa Gobernador basig duna daw lapses sa secretary sa Sangguniang Panlalawigan nga wala daw gipa-receive ang approved ordinance sa lungsod sa Pantukan.

Ang Mayor pud, ang iyang aksyon morag inosente nga walay kalibutan nga may mga tawo bang mibalik didto ug nagpadayon sa pag-operate sa illegal nga pagmina. Karon, nanggawas na ang sekreto nga kamo diay'ng mga politikoha mo, maoy pinakadagkog tunnel sa Barangay Napnapan.

Kon sabagay (SOP) nana, "standard operating procedure" nga magtago gyud ang mga politiko kay nag-finance man gud og illegal. Tan-aw nako sa ilang duha suod kaayong amigo, pero dili magkatinutokay og tan-aw. Gilimod ni Mayor Celso "Tok" Sarenas nga wala kuno siyay tunnel sa Barangay Napnapan.

Matud pud ni Gobernador Arthur "Chiongkee" Uy, nagpa-inbistigar kuno siya kay morag dunay tulo ka dagkong politiko nga pinakadagkog tunnel sa maong lugar. Kinsa mana Governor, nganong dili kaman makahingalan?

Ang buot bang ipasabot nga ang nangamatay sa landslide sa Barangay Napnapan walay politikong manubag ug sad-an? Mayor Tok Sarenas, ayaw kog ingna nga wala gyud kay nahibaw-an nga may mga tawo nga nagpuyo didto ug nagpadayon sa illegal nga pagmina?

Kon mao, unsang klasiha ka nga mayor sa Pantukan nga walay kalibutan sa mga kalihukan sa imong Barangay? Si Gobernador Uy tungod kay amahan sa lalawigan itulak diha nimo kay ikaw may Mayor sa Pantukan diin diha nahitabo ang trahedya. Kon way mo-angkon sa maong katalagman, kinsay atong pasanginlan si P-Noy? Si Barak Obama? o kaha ang Guinoo?

Responsabilidad ninyong mga LGUs sa lalawigan ang mga kinabuhi nga nakalas gumikan sa inyong kapabayaan. Dili ba Governor ug Mayor?

Paminawa ang "KONTRA BALANSE" sa DXKT 1071 Khz 7-9 a.m. Mon-Sat ug ang RPN Visayas Mindanao Koneksyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph