Genoguin: May kabag-ohan ba tali P-Noy ug GMA?

DAGHAN ang wala nato masayri sa wala pa ibulgar ni Senador Jinggoy Estrada ang mga kahiwian sa executive department apil na legislative department sama sa paggamit sa salapi gikan sa atong mga buhis.

Sa gihimo ni Estrada, dili na sila ang sentro karon sa isyu, dili susama sa milabay nga gipunting silang tulo si Juan Ponce Enrile, ug Ramon "Bong" Revilla.

Dinhi pa nato nasayri nga halos silang tanan nagpahimulos sa mga pribilihiyo nga dili unta angay, samtang ang mga katawhang Pilipino nag-antos sa tumang kagutom.

Kining tanan dili sulagma, kon dili tinuyo. Matud pa ni Mayor Rody Duterte sa usa ka okasiyon dihang gi-blesingan ang Congressional office ni 1BAP Party-list Representative Silvestre "Bebot" Bello III, ang pagtugyan sa ilang Priority Development Assistance Fund (PDAF) ngadto sa Non-government Organizations (NGOs) nga pulos mga paryente ang membro, usa na ka kriminal nga binuhatan. Ug nasayod ang mga congressman ana kay dili man sila mga ugok.

Wala kita mahibalo nga aduna diay Disbursement Acceleration Program (DAP) kon wala gibulgar ni Senador Jinggoy Estrada nga napuno na sa mga batikos sa iyang mga kauban nga nagpahinlu-hinlo, pero labaw pa diay nga kurap.

Samtang ang mga bantugang abogado ug pipila ka associate justices sa Supreme Court nagsulti nga illegal ang DAP, ang duha ka tigpamaba sa palasyo magbuwabuwa pud ang baba pagdepensa kay alang nila, legal kuno ang DAP.

Ang budget insertion nga kanunay ginayawyaw ni P-Noy nga illegal, ug gi-insert sa mga kongresista sa ilang tinuig nga budget, gawas sa ilang PDAF, mikabat na ngadto sa P72- bilyones.

Pero, kinsa man kining mga tawhana ang gisaway ni P-Noy? Mga congressman sila nga nagpahimulos sa administrasiyon ni kanhi Presidente Gloria Macapagal Arroyo. Unahon ta si Franklin Drilon, daan nang senate president sa panahon ni GMA? Nag-resign kay kuno nanikas ang kanhi presidente sa 2004 eleksiyon batok kang FPJ.

Si Kiko Pangilinan nga naputol ang (gavel sa pagdinukdok) aron lang gyud paboran si Gloria Macapagal Arroyo niadtong panahona, asa na siya karon? Naa naghulat og unsay pwesto nga ihatag ni P-Noy.

Kinsa pa? Di ba apil sab sila si Ralf Recto, si Mar Roxas nga sakop sa gabinete ni GMA ug Joseph Estrada sa ilang panahon? Kining mga tawhana morag mga linta nga walay pagkabusog, kanunay nag-ukob ug nagsupsup sa dugo nga maoy naghatag og kinabuhi sa atong panudlanan nga mao ang buhis sa mga katawhan.

Hayahay kaayo sila, samtang kita nagpait sa kalisud. Nahibawo ba mo nga gawas sa ilang PDAF duna pa gyud silay laing income? Ang Speaker aduna siyay Congressional Leadership Fund P500,000,000.00 ang tuig, Majority Leader P300,000,000.00 kada tuig, ang Assistant majority Leader P 200,000,000.00, ang chairman sa committee on appropriation P200,000,000.00 (mao na ang position karon ni Congressman Isidro Ungab nga nalanmbigit sa pork barrel scam. Ang mga chairman sa mga nagkadaiyang komitiba, tag P100,000,000.00 ang tuig lang. Karon, duna bay kabag-ohan tali P-Noy ug GMA? Kamo nay tubag.

Alang sa inyong dugang komento, pag-email lang sa algenoguin@yahoo.com o superbalitadavao@yahoo.com.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph