Genoguin: Mga Duterte nagsuporta daw sa NPA?

WALA makurat ang mga katawhang Davawenyo sa intelligence report gikan sa military nga nagsuporta ang mga Duterte sa rebeldeng New People's Army (NPA) tungod kay dili kini bag-ong balita alang kanato.

Tuig 2003, gidungog na nga nagsuporta daw si Bise Mayor nga kaniadto Mayor Rody Duterte. Mao gihapon ang estorya, nga nanghatag daw siya ug mga bala sa mga rebeldeng New People’s Army didto sa bukirang bahin sa lungsod sa Maco Compostela Valley Province, ug ang report gikan daw sa “Intelligence Services Armed Forces of the Philippines (ISAFP)”.

Pero ang tanan pulos man lang estorya? Gani, gigamit pa kining isyu niadtong milabay’ng eleksyon nga ang mga NPA nagkampanya kuno pabor sa kandidato sa mga Duterte, apan pagkatapus sa eleksyon gibiyaan mag tagali-og nga botos ang mga kalaban?

Karong bag-o, naghatag napud kuno ang atong bise mayor ug 45 kalibre nga pistola kang Kumander Parago, ug gipatambalan pa gyud sa Davao Mission Hospital dihang nasamdan ang Kumander sa NPA. Kining tanan pulos gipanghimakak sa bise mayor nga dili tinuod. Unsa may buot ipasabot, palpak ang intelligence report sa military?

Hinuon, kon imong paminawon ang mga katarungan sa bise mayor, duna siyay punto nga ang iyang pagpakigkita ug pagkakigsuod sa mga rebelde para sa kalinaw sa dakbayan sa Davao, tungod kay dili patay ang solusyon alang sa kalinaw kon dili pagpakig-estorya mga rebeldeng NPA o rebeldeng MILF.

Matud pa sa bise mayor, wala pa gihapon siya malimot sa iyang “Oath of Office” ang iyang gipanumpaan nga loyal siya sa atong Republika. Pero, kadiyot lang bise mayor wa may dautan kon mangutana ta, diba? Mangutana lang ko, kon loyal ka sa atong gobyerno nganong midawat kaman sa tanyag ni NDFP Chairman Luis Jalandoni isip resource person sa umaabot nga peace talk nga kaaway man sila sa atong gobyerno, nangutana lang ha?

May mga tawo nga nagtuo nga nagsuporta si Bise Mayor Rody sa mga rebeldeng NPA, pero may mga tawo usab nga dili motuo sanglit gi-idolo nila ang atong bise mayor.

Kining maong pangutana magbalik-balik sa umaabot pang mga adlaw. Nagsuporta ba gyud ang mga Duterte sa rebeldeng NPA? Nagtumo-tumo ba usab ang Intelligence sa military? Kinsa man kanila ang atong tuhoan si Duterte o miltary? Kamo na ang mag balanse.

Paminawa ang “KONTRA BALANSE” sa dxKT 1071 sa dial sa inyong mga radyo, alas 7 hangtod alas 9 sa buntag Lunes hangtod Sabado. Alang sa inyong sugyot ug komentaryo pag-email sa algenoguin@yahoo.com

Related Stories

No stories found.
SunStar Publishing Inc.
www.sunstar.com.ph