Genoguin: Pacquiao may ikabuga pa ba?

KUSOG ang pustahan kagahapon sa away ni 8 Division Champion Manny Pacquiao ug Timothy Bradley. Dunay pustahan nga 7-10. Ang buot ipasabot, ang imong P7,000.00 modaug og P10,000.00 pabor kang Manny Pacquiao.

Aduna say pustahan nga modaug sila kon dili ma-knock-out ni Manny Pacquiao si Timothy Bradley, bisan paman kon modaug si Pacquiao sa unanimous decision. Tungod niini, todo paningkamot si Hall of Famer coach Freddie Roach nga duna gyuy knock-out nga mahitabo sa ilang away.

Gustong bawi-on ni Freddie Roach ang mga kantiyaw ngadto kang Manny Pacquiao nga 'going down' ang atong boxing hero, tungod kay upat na ka away ni Pacquiao nga walay knock-out nga nahitabo.

Ang katapusang away ni Manny nga dunay knock-out mao si Miguel Cotto niadtong Nobyembre 2009. Si Joshua Clottey, Antonio Margarito, Sugar Shane Mosley ug Juan Manuel Marquez wala nay knock-out nga nahitabo.

Sa record ni Manny Pacquiao, adunay 59 ka away, 54 ang daug, tulo ang pildi ug duha ang tabla samtang si Timothy Bradley 28 ka daug, ug wala pay usa ka pildi.

Samtang atong gisuwat kining maong lindog, miguwa ang pangutana nga may ikabuga pa ba si Manny Paquiao niining awaya? Sa kamot kaha ni Manny makaangkon og kapildihan si Bradley o si Bradley kaha ang makapukan ug makapa-retiro sa atong boxing hero?

Dunay mga pag-analisar sa atong mga boxing analyst nga walay ikapanghambog si Timothy Bradley, kay dili mga rated nga boksidor ang iyang gipangpildi. Si Manny Pacquiao, mga inilang boksingero sa tibuok kalibutan ang iyang giparetiro human niya gipahagba ibabaw sa ring.

Hinuon dunay nagsulti nga dili angay mokompiyansa si Manny kay bisag dili rated nga boksidor sa Bradley, pareho sila nga dunay kumo inig saka nila sa ring.

Si Orlando Salido, dili rated nga boksidor, apan siya ang nakamantsa sa record ni Juan Manuel Lopez nga walay pildi sa feather weight division.

Mao sab kini ang nahitabo kagahapon ni Pacquiao kinsa gipildi ni Bradley.

Pilipino kita, atong i-ampo ang kadaugan ni Manny Pacquiao sa sunod nga panagharong nila sa ring. Hinuon, determinado kita nga utokan si Manny, ug may pagslig kita kaniya, tungod kay dili basta-basta pahagbaon ang atong 8 division champion.

Sa 17 ka tuig sa iyang boxing carrer, duha lang ka higayon nga na knock-out si Manny. Si Rustico Torrecampo ug si Medeogen Singsurat ang nakapildi kaniya, pero dili pa ilado ug sikat nga boksidor si Manny Pacquiao niadtong panahona.

Sukad sa pagsikat ni Manny, si Erik Morales lang ang nakapildi niya, pero dili knock-out. Apan, sa ilang pagbalik sa duha ka mga engkuwentro gipahagba niya si Morales.

Good luck Manny! Gipanghianut ka namo nga modaug ug makahatag pa gihapon og dugang dungog sa atong nasud sa sunod nga mga higayon tungod kay labing una kang boksidor sa kasaysayan sa tibuok kalibutan nga nahimong 8 division champion.

Paminawa ang "KONTRA BALANSE" sa radyo DXKT 1071 Khz 6:00 to 7:00 AM Lunes hangtud Sabado, ug ang RPN Visayas Mindanao Koneksiyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph