DAVAO CITY -- Usa ka tawo kinsa giakusahang nang-hostage ang nakalingkawas sa posibleng kaso sa korte human gipanalipdan siya sa misyonaryo nga giingon nga iyang gi-hostage niadtong Martes.
Giakusahan mao si Earl Anthony Hipolito, 29, minyo, way trabaho, residente sa 783 Tulip Drive, Barangay Matina Crossing, siyudad sa Davao.
Si Hipolito gidakop sa mga sakop sa Investigation Detection and Management Branch sa Davao City Police Office human nadawat ang balita nga gi-hostage niya si Dolores Garnet Farlin, 59, minyo, registered nurse, misyonaryo ug lumad nga taga Estados Unidos.
Daling miadto ang mga pulis sa balay sa biktima didto sa Marfori Heights, ning siyudad, dihang nakadawat sila og report nga dunay hostage taking nga nahitabo.
Pag-abot sa mga pulis, ilang gidakop ang gitudlo nga suspek aron imbestigahan sa kapulisan alas 9:15 sa buntag, Huwebes.
Si Farlin, dihang gipangutana sa kapulisan, nagbutyag nga miabot sa ilang lugar si Hipolito kinsa nagsulti nga nangita siya og trabaho.
Sa ilang pagsultihanay sa gawas sa ilang balay, suma ni Farlin, gibutyag ni Hipolito ang iyang suliran nga dunay mga tawo nga nangita kaniya, ug buot siyang patyon.
Gipangatarungan ni Farlin nga wa siya gipugos ug gipasakitan sa suspek niadtong higayona mao nga way kamatuoran ang report nga gi-hostage siya.
Sa pagsikop sa suspek, suma sa kapulisan, wa sab silay nakuha nga armas.
Giingon sa misyonaryo nga di siya mopasaka og kaso sa suspek sanglit di tinuod ang pasangil batok sa lalaki. (AD)