ORMOC CITY- Patay ang secretary sa editor-in-chief sa usa ka mantalaan sa Leyte human gidunggab niadtong Sabado sa gabii gawas sa ilang panimalay.
Giila ang biktima nga si Demeterio Colo, 58, residente sa Red Cross Village, Bagong Buhay ning dakbayan.
Sa taho ni CInsp. Virgilio Bayon-on, hepe sa Police Station 3 ning dakbayan, nga si Colo paingon nang mopauli sa iyang pinuy-anan apan wa niini damha nga giatangan na diay siya sa suspek nga si Ronnie Damas, 37, ug lumad nga taga Misamis Occidental.
Sa dihang niabot na sa iyang balay ang biktima kalit siyang gidunggab ni Damas og naigo ang iyang dughan nga maoy hinungdan sa hinanali niyang kamatayon. Human sa insidente, daling nakasibat ang suspek.
Midugang sa pagpadayag si Bayon-on nga ang biktima usa ka secretary sa editor-in-chief sa mantalaang West Leyte Weekly Express nga si Felix Codilla III.
Nasayran nga ang biktima ug ang suspek adunay panagbangi apan wa masayri kon unsay hinungdan. Apan, ang kapulisan wa pa mobuhi og pamahayag kon may kalabutan ba sa trabaho niini.
Padayon karon ang imbestigasyon sa kapuliusan ingon man padayon nilang gipangita ang suspek. (John Kevin D. Pilapil Correspondent)