Giluba human nagbikil sa kanta

NAHABWA ang tina-i sa usa ka lalaki human giluba sa wala mailang suspetsado niadtong Domingo mga alas 5:45 sa hapon sa Poblacion, Malaybalay, Bukidnon.

Kritikal ang kahimtang nga nilanding sa Northern Mindanao Medical Center (NMMC) ang biktima nga mao si Web Art Ginagao, 33, ulitawo, sa susamang dapit.

Nasayran nga nag-inom ang biktima sa usa ka videokihan sa maong dapit dihang miabot ang wala mailang suspetsado.

Giingong nagkabikil tungod sa kanta, apan kalit lang nga nasuko ang suspetsado dayon hublot sa 4 pulgadas nga kutsilyo ug deretsong giluba ang tiyan sa biktima ug wala pa nakuntento gilaslas pa niini miresulta sa pagkahabwa sa tina-i.

Daling misibat ang suspek human sa pagpangluba dihang wala nabantayan sa kataranta sa mga tawo sa dapit sa pagtabang sa biktima.

Dihang miresponde ang kapolisan sa Malaybalay City Police Office pakyas sila sa pagsikop sa suspetsado.

Gidala pa kini sa balay tambalanan sa maong dapit, apan giduso sa NMMC ning siyudad sa Cagayan de Oro tungod sa grabeng naangkon.

Ubos pa sa obserbasyon sa mga doktor ang biktima nga gikatakdang operahan.

Ang suspetsado padayon pa nga gipangita sa kapolisan sa Malaybalay Police Office, kinsa nailang suspek sa mga pagparegla sa maong dapit. (Stephanie V. Berganio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph