Gilugit ang mga mata, giputlan sa dila, mga dunggan

LINUOG nga gipatay ang usa ka habalhabal driver nga gilabay sa usa ka hilit nga dapit sa dakbayan sa Danao.

Gipanitan sa mamu­muno ang nawong, gi­lugit ang duha ka mga mata ug giputlan sa duha ka mga dunggan, giputlan sa dila ug ubol-ubol.

Napalgan ang lawas sa biktima kagahapon sa alas 9:45 sa buntag sa Barangay Sabang, dakbayan sa Danao.

Si Cerilo Dayday Jr., 31, ulitawo, habal-habal driver, taga Barangay Lataban, Liloan, gituohang gi-salvage sa wa pa mailhing killer.

Si PO2 Rommel Gomez, desk officer sa Danao Police Station nga nahinabi sa dySS Super Radyo ug Sun.Star Superbalita, nagkana­yon nga usa ka Zacarias Cuizon, 48, taga Barangay Looc, dakbayan sa Danao, maoy nakakita sa biktima.

Si Cuizon nibutyag nga samtang mamusil siya og langgam sa nahisgutang lugar, nakugang siya dihang nakit-an niya ang usa ka patayng lawas sa tawo nga nagbuy-od.

Matod ni Gomez nga nailhan ang biktima gumikan sa identification (ID) card nga nakuha diha sa iyang possession sanglit intact pa ang pitaka niini.

Si SPO1 Rodrigo Roble, imbestigador sa Danao Police Station nga nahinabi sa GMA 7 Balitang Bisdak, mibutyag nga base sa kahimtang sa lawas sa biktima, grabe ang kalagot sa killer ngadto sa biktima.

Gipadayag niya nga posibling dunay hulga ang biktima sa wa pa patya.

Apan ang amahan nga si Cerilo Sr. nipadayag nga maayong tawo ang iyang anak sa ilang lugar walay kontra hinungdan nga naglibog sila kon nganong gipatay og ingon niadto.

Ang bugtong pagpangita sa iyang anak mao lang ang pagmaniho og motorsiklong habalhabal.

Gipanghinaot niya nga makonsinsiya ang responsabli sa kremin ug iuli ang motorsiklo sang­lit wa pa maimpas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph