NAKURAT ang tibuok banay sa usa ka ginang human nga naghikog siya pinaagi sa pagyarok og usa ka basong tubig nga timplahan og cyanide didto sa Sawata, San Isidro sa Davao del Norte.
Giila ang nagpakamatay nga si Candelaria Laborte, 49, minyo, molupyo sa maong dapit.
Ang umagad ni Candelaria nga si Grace Laborte nadiskobrehan nga wala nay kinabuhi si Candelaria alas 7 sa gabii niadtong Lunes.
Sa pakighinabi sa Superbalita, gikanayon ni Arman Unong, umagad sa nagpakamatay, nga walay foul play sa hitabo. Nagtuo siya nga usa sa hinungdan sa pagpakamatay sa biktima mao ang iyang dakong utang.
"Gamay ra man unta, kaya ra man tong bayaran," tin-aw ni Unong.
Nasayran nga gitayming matud pa sa ginang nga mag-inusara niadtong higayuna ug nikuha og usa ka pakiteng cyanide ug gitempla sa baso, dayong yarok. Dali siyang gidala sa Kapalong District Hospital apan namatay.
Hinuon, una nang nanugon si Laborte kang Grace nga didto na papuy-on sa Tagum City sa balay sa iyang umagad nga si Arman, ang kinamanghurang anak babaye aron makapadayon sa pagtungha sa Grade 6.
Nasayran nga ang cyanide maoy pangtunaw sa bulawan nga gikatingala usab sa mga tagtungod kung asa kini gikuha sa biktima.