GIDUDAHANG kauban ra sa sayaw ang nipusil-patay sa usa ka mag-uuma sa Barangay Togonon, siyudad sa Danao sa miaging gabii.
Apan, alas 6:00 sa buntag napalagan ang biktima nga si Antonio Durano Jr., 22, ulitawo, usa ka mag-uuma, ug nanimuyo sa nahisgutang dapit.
Matod ni SPO4 Jose Salingua Jr., desk officer nga nahinabi sa Sun.Star Superbalita nga usa ka Roy Batoon, sakop sa force multipliers sa Danao, maoy nipahibalo kanila nga adunay napalgang lawas sa tawo kilid sa diskohan.
Nasuta nga may duha ka samad pinusilan, usa sa tuo nga dughan ug tiyan ang namatay nga si Durano.
Ang mga responding policemen pinangulohan ni SP02 Gaudencio Manulat walay nakuha nga ebidensya sa crime scene.
Samtang ang imbestigador sa nahisgutang kaso nga si SP01 Glenn Manulat nisubay sa tanang anggulo lakip na sa gitan-aw ang tatoo sa lawas sa namatay kon dili ba kini membro sa mga fraternity.
Ang amahan nga si Antonio Durano Sr. nga mibisita sa Danao Police niingon nga wala siya masayod kon may kontra ang iyang anak sanglit kanunay kining motabang kaniya sa pagpanguma.
Ang lawas ni Durano gidala sa usa ka punerarya sa Danao. (DQG)