Gravahan, gisamok sa mga aswang?

DAVAO CITY - Human nga nabulabog ang pipila ka residente sa Barangay 21- C Poblacion sa giingong dunay 10-anyos nga batang lalaki ang gitangag sa aswang, laing usa ka setenta anyos nga babaye ang misaysay sa susama sab nga kasinatian.

Kagahapon sa udto, mipatim-aw sa buhatan sa Sun.Star Super Balita si Manang Endring (bansagon gitago), minyo, lumad nga nagpuyo sa Gravahan, Barangay 74-A, Matina Crossing aron i-asoy ang iyang kasinatian sa aswang.

Dala ni Manang Endring ang iyang blotter gikan sa Talomo Police Station, pinetsahan Pebrero 17, 2014 nga nag-asoy sa iyang nakita ug nabati ibabaw sa atop sa iyang balay nga dunay giingong aswang nga nagpa-uraray.

"Kining akong blotter nakonekta na lang ni sa akong nabasa sa SuperBalita ug nakita sa balita sa telebisyon sa 10-anyos nga bata kinsa gi-aswang. Mao tong nia ko aron isulti nga duna pod mi silingan nga aswang," sulti ni Manang Endring.

Gidugang niya nga sa dihang nakita niya ang iyang silingan nga iyang gitahapang aswang, daw takluban siya sa aso dayon malipong siya.

"Makita nako sila, tawo gyud pero lahi akong mabatyagan, kanang aso sa hinungaw sa kaldero nga luto sa kan-on, kana dayon malipong ko," asoy niya.

Gani suma pa nagsukod kini nga iyang gisuspetsahan dihang dul-an tranyta ka mga banay niini gikan sa lungsod sa Malita, Davao Occidental ang miabot ug iyang madungog ang mga inistoryahan nga ikatindog sa iyang balhibo.

"Taga Malita ni sila, sa tan-aw nako di na sila kaantus sa bukid mao nang milugsong sila diri, nakigsagol sa tawo nga dunay dakong pagtuo sa Diyos," ingon niya.

Dugang sa iyang pagpamatuod makita niya kini kada gabii nga mopatong sa iyang atop ug mokaskas, butang nga iyang gikahadlok sanglit daghan siya og apo sa tuhod ug mga anak sa palibot.

"Daghan god ko'g apo, unsa na lang kaha og manghilabot gyud sila," matud ni Manang.

Iya sab nga i-asoy nga ubay-ubay na sa ilang mga silingan ang iyang gituohan nga gihilabtan tungod kung dunay buntis nga manganak, ang uban mangamatay nga way igong hinungdan.

Hinuon, ang nahitabo gipatala na sab ni Manang Endring sa kapulisan aron ugaling dunay mahitabo kanila, duna sila'y daling matudlo gumikan sila ang kanunay nga gipakita. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph