Gungob miangkon na sa kapildihan; way protesta

MIDAWAT na sa iyang kapildihan si kanhi mayor Avelino Gungob sa lungsod sa Consolacion.

Ang iyang pagdawat gipaagi sa usa ka suwat nga gipadala ngadto ni Mayor Theresa Alegado.

Ang suwat personal nga gi-type ni Mayor Gungob nga nagpadayag sa iyang pahalipay ngadto ni Alegado.

Apan niawhag kining mokonsulta og transparency sa iyang mga proyekto diha sa iyang lungsod ug siguroon ang kaayuhan sa katawhan. Nasayran nga si Alegado nakakuhag botos nga 27, 220 samtang si kanhi Mayor Gungob nakakuha lag 23,917 botos. Gipasabot ni Gungob nga bisan ug aduna siyay pagduda sa resulta sa miaging eleksyon, apan dili niya ipamugos ang iyang kaugalingon ug kinahanglan siyang modawat sa kapildihan agig pagpakita sa iyang respeto sa katawhan sa Consolacion.

Nanghinaot si Gungob nga moserbisyo si Alegado sa ilang lungsod sa tinarong nga pamaagi.

Nadismaya usab si Gungob sa Precinct Count Optical Scan (PCOS) machines tungod kay alang kaniya mas maayo pa ang manual counting sanglit dili man makita ang resulta sa tally.

Si Gungob mibutyag nga mobalik siya sa pagdagan kon mobalik na sa manual counting sanglit iyang nakita nga ang nasud dili pa andam sa PCOS machines. 

Iyang giklaro nga bisan sa iyang kapildihan padayon siyang moserbisyo ngadto sa katawhan pinaagi sa iyang natukod nga Movement for Progressive Consolacion (MPC) diin adunay programa sa panginabuhian sa tuyo nga aduna silay income.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph