Haladaya Festival: Halad pasalamat sa taga Daanbantayan

PADAYON ang paghalad sa mga Daanbantayanon atol sa ilang Haladaya Festival 2014 diin gipahigayon niadtong Agusto 30 sa lungsod sa Daanbantayan amihanang bahin sa Sugbo.

Bisan sa mga kalamidad ug hagit nga ilang naagian niadtong niaging tuig mapasigarbohon ang Daanbantayan sa ikapanghambog nga maanindot, makalingaw, ug mabulokon nga festival sa amihanan ang Haladaya Festival.

Niadtong 2003 dihang gisugdan ang labing unang Haladaya Festival. Usa kini ka kalihokan isip paghatag og halad pasalamat sa labing unang lider sa lungsod nga si Datu Daya.

Gipanganlan kinig Haladaya isip “Halad kang Datu Daya” kinsa mao usab ang nagmugna sa lungsod nga Daanbantayan.

Di lamang si Datu Daya ang gihatagag halad pasalamat sa mga Daanbantayanons lakip na ang patron sa lungsod nga si Sta. Rosa de Lima kinsa 128 ka tuig na nila nga patron.

Karong tuiga adunay lima ka mga contingent ang niapil sa tinuig nga Haladaya Festival Street Dancing ug Grand Ritual Showdown.

Adunay 20 ka mga barangay ang lungsod, upat ka barangay matag contingent diin mga estudyante sa elemetarya ang lakip sa mga mananayaw sa nagkadaiyang tunghaan.

Nanghawod ang “Tribu Kasikas sa Kandaya” gikan sa Barangay Maya, Logon, Talisay, ug Tominjao nga mao ang kampyon sa Haladaya Festival 2014 Best in Ritual Showdown.

Naangkon usab nila ang Best in Costume, Best in Street Dance, Most Disciplined, ug gideklarar nga 1st runner up ilang Datu Daya.

Ang “Tribu CaLaAg-Ta Sa Kandaya” gikan sa Barangay Tapilon, Lanao, Agujo, ug Carnaza ang gideklarar nga 1st place sa ritual showdown lakip sa ilang nadag-an mao ang Best Andas.

Ang “Pundok sa mga Kabatan-onang Kandayanon” gikan sa Barangay Poblacion, Pajo, Malingin, ug Tinubdan ang 2nd placer sa ritual showdown diin 2nd runner up ang ilang Datu Daya.

Gideklarar nga 3rd placer sa ritual showdown ang “Masidlakon Kandayan-on” gikan sa Barangay Bitoon, Paypay, Dalingding, ug Bakhaw.

Samtang ang “Pundok sa Kandayan-ong BaCaMaBa” sa Barangay Calape, Bagay, Malbago, ug Bateria ang nakaangkon sa 4th place sa ritual showdown lakip sa ilang nadaug mao ang Best in Audio Van ug Festival King.

Ang chairman sa Haladaya Festival 2014 nga si John “Jinggo” Valiente malipayon ug mapasalamaton taliwa sa mga kasungian ug hagit nga niatubang kaniya sa pagplano ug preparasyon sa festival nagmalampuson kini.

Susama ni Valiente mao sad kini ang gitataw ni Daanbantayan Mayor Augusto Corro matod niya nga nahinabi sa Sun.Star Superbalita nga nagpakita lang ang kapiyestahan sa pagbarog pagbalik sa katawhan sa Daanbantayan “we’re very happy, it just shows the resiliency of our people here in Daanbantayan”.

Sa kataposan nagpamatuod lang nga ang mga Kandayanon di dali-daling matumpag sa bisan unsang kalamidad o hagit apan nagpabilin kining malaumon ug positibo sa kinabuhi.

Busa ayaw sipyata pagduaw ug pag-apil sa paghalad ug pa­sa­lamat sa mga Kandayanon sunod tuig sa Haladaya Festival. (Ogherty B. Lopez)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph