NADUSO na sa kahugpungan sa mga bus ug mini bus operators ang ilang suwat hangyo sa Economic Enterprise Council sa kagamhanan sa lalawigan sa Sugbo nga nangayo og rekonsiderasyon sa gipatuman nga usbaw sa terminal fee sa Cebu South Bus Terminal.
Sila si Richard Corominas, presidente sa Cebu Provincial Bus Operators Association ug Julieto Flores, presidente sa Cebu South Mini Bus Operators Association nangunay paghatod sa suwat hangyo ngadto kang Gob. Gwen Garcia, chairperson sa EEC sa buhatan niini sa Kapitolyo kagahapon sa hapon.
Sila nihangyo nga inay 100 porsiyento, himuon nga 20 porsiyento ang usbaw sa terminal ug parking fee sa mga mini bus nga mosud sa CSBT samtang 30 porsiyento sa mga bus.
Sugod niadtong Nobiyembre 1, gikan sa P100, nahimo na nga P200 ang terminal fee sa mga bus samtang P50 na gikan sa P25 ang arrival fee.
Si Flores nipadayag nga bug-at ra kaayo ang gipatuman nga usbaw ug dako kini og epekto ngadto kanila mga operators.
“Wa tay gireklamo sa fees kay five years naman sad na. Pero sobra ra kadako (increase),” padayag niini.
Si Garcia niingon nga ilang tan-awon kon unsay mahimo sa EEC sa hangyo sa mga bus ug mini bus operators atol unya sa ilang sunod nga tigom.
Siya nipadayag nga sa iyang nahibaw-an ang mga mini bus operators ang nihangyo nga paminosan ang umento sa terminal fee tungod sa gidaghanon sa mga pasahero niini.
Apan siya nitataw nga ang pag-umento sa bayranan alang sa mga bus sanglit base sa iyang nahibaw-an dunay ordinansa ang siyudad sa Sugbo nga kutob lang sa Citilink ang mga mini bus.
Si Flores niingon nga nalangay sila pagduso og mosyon sa EEC tungod kay naapekihan sila sa oras ug daghan usab ang mga pasahero nga nidagsa sa terminal niadtong adlaw sa mga santos ug mga minatay.
Siya niingon nga kon di mahatag sa EEC ang ilang hangyo, moduso sila og petition for reinstatement ug kolektahon ang tukma nga pletihan nga gitugot sa Land Transportation Franchising and Regulatory (LTFRB) 7 nga P8.50 alang sa unang lima ka kilometro ug P1.45 sa mosunod nga kilometro.