Hapon, mama sa 15-anyos gisikop

USA ka Japanese national ang nasikop sa Task Force on Human Trafficking sa Cebu Port Authority, human kini nasigpati nga molarga unta paingon sa Bohol, kuyog ang usa ka menor de edad nga babaye.

Ang Hapon nga si Masahiro Shinuda, 65, nasikop sa taga-CPA niadtong Biyernes human makit-i diha sa Pier 1 nga dunay kuyog nga 15-anyos nga babaye.

Giingong nagkaila ang duha sa da­ting site nga Filipina Heart, human usab gi-post sa inahan sa bata ang profile sa iyang anak sa maong internet site.

Hunyo karong tuiga, unang nagkita ang menor de edad ug ang hapon nga si Shinuda sa ilang panimalay sa Talisay City ug ang ilang paglarga unta niadtong Biyernes mao ang ilang ikaduhang panagtagbo.

Dihang anaa sila sulod sa Pier 1 Terminal pasado alas 11 niadtong Biyernes, nagduda ang tigpamaba sa task force sa CPA nga si Dan Labata sa relasyon sa duha ug sa posibleng ilegal nga kalihukan sa langyaw hinungdan nga niduol gyud siya sa bata sa dihang dunay gipalit ang langyaw.

Nasayran ni Labata nga dili ig-unsa ang duha hinungdan nga gisikop sa mga sakop sa CPA ang hapon tungod sa posibleng kalapasan niini sa mga lagda sa trafficking ug child abuse.

Nasayran sa CPA nga nagkuyog na sa pagkatulog sa usa ka hotel ang hapon ug ang 15 anyos nga babaye, apan hugtanong gipanghimakak sa bata nga dunay nahitabo kanila.

Human sa iyang pagka-sikop, gibalhog ang langyaw sa Waterfront Police Station.

Si Shinuda gipasakaan na ug kasong attempted trafficking ug child abuse kagahapong adlawa sa mga sakop sa CPA.

Nag-atubang sab sa susamang kaso ang  45 anyos nga inahan sa menor de edad. Matod sa officer-in-charge sa Intelligence and Investigative Section sa CPA, Atty. Evan Epe, ang inahan maoy nilawog sa iyang anak ngadto sa kalautan aron lang makapanguwarta.

Ang inahan maoy nibutang sa profile sa iyang anak sa dating site, diin iya kining girehistro nga dunay edad nga 19 anyos.

Giingong giganahan ang Hapon sa bata hinungdan nga iya kining gi-anhi dinhi sa Sugbo ug gi-sponsoran sa pagpa-eskwela ug uban pang mga galastuhan niini.

Pagka-karon, anaa sa kos­tudiya sa Department of Social welfare and Development ang naluwas nga menor de edad.

Samtang ang langyaw ug ang inahan nga gikiha kagahapon apan nagtinguha sa pagduso og piyansa alang sa temporaryong kagawasan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph