Hapsay nga kasaulogan

WALA nay gipili karon ang mga kawatan. Bisan unsa nga balay, madato o mapobre, basta makapabor sak-on ug kawatan sa mga kabtangan.

Bisan gani mga balay sa pulis ug sakop sa media, di pasayluon basta makahigayon.

Susama sab sa mga tulisan, wa say pilion bisan kinsa basta makahigayon, tulison. Ang uban gani gipatay kon magmagahi nga ihatag ang ilang mga kabtangan.

Ning panahon sa Semana Santa, daghan kanato ang mangapil sa mga kalihukan sa simbahan sama sa pagtambong og Santos nga Misa sugod sa Huwebes Santo hangtud na sa Dominggo sa Pagkabanhaw.

Samtang ang uban manuroy uban ang pamilya aron nga mag-bonding-bonding.

Maayo ang pag-apil sa mga kalihukan sa simbahan karong panahona isip paghinumdom sa pag-antus, pagpasakit ug pagkamatay sa atong Ginoo.

Maayo sab ang pag-bonding-bonding uban ang tibuok pamilya.

Apan pahimangno lang sa tanan nga di nato kalimtan ang paghatag og seguridad sa atong mga kabtangan ilabi ning panahona nga uso ang kawat ug tulis.

Kinahanglan nga sirad-an og maayo ang atong mga balay kon manglakaw ta. Kon mahimo, kinahanglan nga binlan og tawo ang balay aron nga maseguro nga way mopahimulos sa higayon.

Di sab ta magdala og mga alahas kon manglakaw aron nga di init sa mata sa mga tulisan.

Pinaagi niini, hapsay ang atong pagsaulog sa Semana Santa ug sa atong paglulinghayaw uban ang atong pamilya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph