Hirit: MOSULTI ANG TUNGANG GABII

Ernesto D. Lariosa

San Fernando, Cebu

Mosulti gayud ang tungang gabii

Labi nag magminatay ang kamingaw

Ug buslot-buslotan sa mga tingog sa ulan

Mahimong kahulogan nga magpasidaan

Nga way kasangputan ang paghinanok

Kon di mo kaunlanan ang kahilom

Nga buot dakpon sa kahadlok

Grabeng mosindol sa imong kilid

Inig-uwang sa imong iro human paghuta

Sa makadaghan ang nagsawop nga buwan.

Ikaw magtungok kay makabatyag

Sa nagkipot nga mga anino sa gawas

Nga sa imong kaisipan hugot manag-iya

Samtang ang mga tiil sa ulan manunob

Kanimo aron di gayud makalihok

Ang naglakaw mong handurawan gapuson

Hangtod sa paglakang sa kabuntagon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph